Децата кои имаат кариес и болести на непцата, може да имаат поголем ризик за развој на срцев и мозочен удар по 3-4 децении, во однос на децата кои имаат добро орално здравје, покажува неодамнешно истражување.
Научниците ги прегледувале забите на 755 деца во 1980 година, кои тогаш имале просечно по осум години, и ги следеле до 2007 година, за да видат колку од нив развиле ризик фактори за срцев и мозочен удар, како висок крвен притисок, зголемен холестерол, повисоко ниво на шеќер во крвта и атеросклеротични промени на крвните садови.
Само 33 деца, односно 4, 5% од нив, немале никакви показатели на орални болести, како крварење на непцата, кариес, воспаление, џебови околу забите кои може да сигнализираат болести на непцата и на забите.
Речиси 6% од децата имале една од тие четири орални инфекции, 17% имале по два знака, а 38% имале три знаци, и 24% сите четири сигнали.
Децата со еден знак на орална инфекција имале 87% поголеми шанси да развијат нешто што е познато како субклиничка атеросклероза: структурни промени и задебелување на артериските ѕидови, што не е доволно сериозно да предизвика компликации. Децата со четири знаци на лошо орално здравје имале за 95% поголеми шанси за развој на таквите видови на оштетени артерии.
