Секое семејство има единствени вредности по кои се води. Тие се производ на она што ги прави среќни членовите на тоа семејство, ги води и ги прави препознатливи. Членовите на семејството со текот на времето градат вредности преку заедничкиот живот, а експертите сметаат дека одредени вредности треба да бидат дел од секое семејство и дека на нив треба да ги учиме децата.
- Љубезност
Љубезноста треба да биде на врвот на листата на вредности бидејќи ги поставува темелите за градење емпатија, дарежливост и еднаквост. Ни помага да изградиме здрави односи внатре и надвор од домот, ни ја олеснува интеракцијата и не прави пристапни. Сепак, љубезноста не треба да биде бесконечна и важно е детето да може да препознае кога некој не заслужува љубезност и кога е неопходно да се постават здрави граници.
- Сочувство (со самите себе)
Многу е важно да ги научите децата да бидат љубезни кон себе. Секое семејство треба да негува култура каде што е во ред да се погреши. Премногу осудување не води никаде. Експертите советуваат да бидете модел за вашите деца и да им покажете колку е важно да имаме сочувство кон себе, и кога сами себеси сме најлоши.
- Интегритет
Да се направи она што сме рекле дека ќе го направиме е важна вештина која децата треба да ја совладаат. Да ги научиме дека можат да се потпрат на нас за еден ден некој да се потпре на нив. Да ги исполниме ветувањата што сме им ги дале и да бидеме доследни во нашите одлуки за да можат и децата да го сторат истото.
- Одговорност
Важно е децата да се чувствуваат како рамноправни членови на семејството. Ако во вашиот дом се негува одговорност, тоа значи дека и детето ќе учествува и во одредени домашни работи, дури и ако тоа е симболично, во првите години од животот. Средувањето играчки, одржувањето на собата уредна и грижата за домашните задачи се должности кои децата самостојно треба да ги прават на одредена возраст.
- Меѓусебно почитување
Ако сакате вашите деца да ги почитуваат другите, дајте им пример за такво однесување во семејството. Почитувајте ги границите на партнерот и детето, слушајте што ви зборуваат и земете ги предвид нивните мислења и емоции. Кога детето чувствува дека го почитуваат дома, дури и кога не добива се што сака, таквото однесување ќе го пренесува понатаму.
- Искреност
Искреноста е темел на здравите семејни односи, но и партнерски, пријателски и деловни односи. Како родител најдобро ќе покажете искреност во ситуации кога ќе направите грешка. Признајте му на детето дека не сте во право и извинете се ако сте го повредиле. Споделете ги вашите грижи со вашето дете понекогаш, на јазик што може да го разбере и поттикнете го да ги сподели своите емоции со вас, какви и да се тие.
- Флексибилност
Способноста за брзо прилагодување на нова ситуација е исклучително важна за квалитетен живот. Пандемијата ни покажа колку можеме и мораме да бидеме флексибилни за да се прилагодиме на нова ситуација. Покрај тоа што ќе помогне во предизвикувачки ситуации, оваа вештина ќе им помогне на децата да станат покреативни и да гледаат на проблемот од различни перспективи.
