Aко имате двор и планирате да ставите лулашка за своето дете, не заборавајте дека во пар секогаш е подобро. Всушност, не само што подобро, велат стручњаците, туку во пар е поубаво бидејќи така децата, низ игра, ќе научат многу работи. Прво, како да бидат кооперативни, како подобро да соработуваат и да бидат подобри тимски играчи. А сето ова се постигнува со лулашките. До овој заклучок дошле и стручњаците од Универзитетот во Вашингтон.
Нема дете што не сака да се лула, тоа е јасно, но помалку е познато дека токму лулашките имаат многу поважна улога во развојот на децата од обичното качување и лизгање по лизгалки. И тоа поради ритмичките, синхронизирани движења кои детето мора да ги научи кога се лула, да се споредува со другите деца, да ужива во таа игра, од која всушност несвесно учи.
Во студијата е појаснето дека децата кога се лулаат едно покрај друго, се обидуваат да се синхронизираат, а со тоа и едното и другото дете всушност во себе будат чувство на заедништво. На тој начин постои една невидлива врска, дури и ако претходно не се познавале. И така не само што децата почнуваат да негуваат некои чувства кон тоа дете, тоа всушност влијае полесно да се поистоветат со другите, побрзо ги откриваат нивните заеднички точки и така полесно се охрабруваат самите себеси во соработка со другите, а сето тоа води и кон полесно решавање на проблемите во идните задачи, особено кога ќе им треба подадена рака, или ќе им биде потребно да се обратат некому за помош.
