Стара изрека вели: „Без оглед на тоа на кого личите во младоста, во триесеттите ќерките се повеќе наликуваат на мајките, а синовите се претвораат во своите татковци.“ Но, што вели науката на оваа тема?
Современите истражувања потврдуваат дека постојат карактеристики кои девојчињата најчесто ги наследуваат од мајките – и тоа не само по изглед, туку и во однесувањето, менталните способности и здравјето. Еве неколку од нив:
Интелигенцијата се пренесува од мајката
Научниците од Универзитетот во Глазгов спровеле обемна студија со над 12.000 млади лица на возраст од 14 до 22 години. Резултатите покажале дека интелигенцијата почесто се пренесува преку мајката. Кај мнозинството учесници, коефициентот на интелигенција бил ист или најмногу 15 поени повисок или понизок од оној на нивната мајка.
Времето на менопаузата е генетски предодредено
Истражување од 2011 година, спроведено од Британскиот институт за истражување на ракот, открило дека предвремената или задоцнета менопауза често е генетски условена. Во студијата учествувале над 2.000 жени, и се покажало дека жените најчесто влегуваат во менопауза на слична возраст како и нивните мајки.
Навиките за спиење доаѓаат „од дома“
Според студија објавена во стручното списание Sleep Medicine, мајките имаат големо влијание врз спиењето на своите деца. Децата на мајки кои страдаат од несоница почесто имаат нарушен сон. Научниците не забележале ист ваков пренос на навики од страна на татковците.
Младоликоста може да биде наследна
Жените кои имаат мајки што изгледаат младолико имаат поголема шанса и самите да стареат поспоро. Истражувањето на Институтот „Макс Планк“ за биологија на стареењето покажало дека митохондријалната ДНК, која се наследува исклучиво од мајката, игра важна улога во процесот на стареење.
Ако сакате да знаете каква иднина ве чека – можеби е доволно само да погледнете во огледало… или во мајка ви.
