Најчеста причина за расправии меѓу родителите е тоа што тие биле различно воспитувани, имаат различни ставови за одредени прашања и сметаат дека единствено таквите ставови се исправни. Тогаш настануваат несогласувања и расправии, а детето кое најмногу трпи во целата приказна е тоа на кое му треба доследност и сигурност, што му го ускратувате со постојани расправии и лоши договори.
Расправиите во врска со детето, решавајте ги насамо
Очекувано е дека нема да се согласувате за се со партнерот во сите ситуации, но постојат начини како тоа се решава, кога во приказната ќе влезе дете, велат експертите.
Не се спротиставувајте еден со друг пред детето. Ова не значи дека детето никогаш не треба да види ваша расправија. Здраво е понекогаш да се расправате пред вашето дете за да му покажете здрави модели за решавање на конфликти, но избегнувајте да се занимавате со прашања што директно го засегаат пред него. Во ситуација кога треба итно да се донесе одлука, однапред договорете се дека одлуката ќе ја донесе личноста која има поцврста позиција во однос на тоа прашање, се додека не стигнете подлабоко да разговарате за тоа.
Секогаш ставајте ја безбедноста на детето на прво место, а кога станува збор за здравјето, безбедноста и благосостојбата на детето, не треба да донесувате одлука врз основа на мислење или компромис, туку да дознаете што е најдобро за детето. Ако не можете сами, побарајте помош од советник или лекарот на вашето дете.
Никогаш не зборувајте лошо за партнерот пред детето
Ако вие сметате дека детето треба самостојно да ги собере играчките, а партнерот смета дека е рано за тоа, вежбајте компромис и оставете го детето да ги собере играчките, но со помош на родителите. Ако различните семејни традиции ве раздвојуваат и ве доведуваат во конфликтни ситуации, осмислете сопствени семејни традиции и земете по малку од секоја или создадете нешто сосема ново за вашето семејство.
Никогаш не зборувајте лошо за вашиот партнер пред вашето дете, па дури и немојте да давате случајни зајадливи коментари кои го поткопуваат авторитетот на тој родител. Таквото префрлување може да послужи како модел за детето во иднина да стане покритично и помалку толерантно кон луѓето.
Попуштете понекогаш затоа што некои битки не вредат повеќе од вашиот мир. Бидете отворени за учење од вашиот партнер и дајте му шанса да ви покаже нешто ново. Некогаш едниот родител поминува повеќе време со детето, па за некои ситуации е пообјективен, додека понекогаш токму тоа е причината зошто не ја гледа пошироката слика.
Најважно за детето е да бидете доследни и да се држите до правилата, какви и да се тие. Запомнете дека има повеќе од едно правилно решение за многу проблеми. Како вие и вашиот партнер комуницирате и како правите компромиси и почитување еден со друг е многу поважно за иднината на вашето дете отколку како вие реагирате во некоја ситуација.
