На децата од предучилишна возраст им е потребен сон во траење од 10 до 13 часа. Важно е да постои рутина, па одредете време кога се легнува во кревет и кога се станува наутро.
Дали на децата на оваа возраст им е потребна дремка во текот на денот?
Голем број деца на предучилишна возраст ги отспиваат потребните часови во текот на ноќта, па немаат потреба да спијат во текот на денот. Тоа е во ред. Постојат и деца кои се уште имаат потреба да отспијат во текот на денот, околу еден час. Тоа се случува ако детето не спие доволно навечер, ако е хиперактивно, ги трие очите и е нервозно. Активните деца на оваа возраст кои се занимаваат со некој спорт можеби ќе имаат потреба да отспијат преку ден, а ако не, секако треба да се одмораат.
Како да му помогнете на детето да спие доволно?
Рутината е многу важна, но исто така и удобна соба во која детето ќе се чувствува добро. Не заборавајте и на рутината пред самото спиење, која може да вклучува капење, облекување пижами, миење заби, читање книга.
Исклучете ги екраните најмалку еден час пред легнување во кревет и не ги оставајте во собата за спиење.
Собата во која спие детето треба да биде мирна и удобна. Детето нека избере своја прекривка и играчка со која ќе спие. Ако детето се плаши од темница, може да вклучите лампа со минимална светлина. Спиењето може да биде отежнато и ако детето секогаш заспива на друго место, па потоа не може во неговиот кревет.
Што ако моето дете има проблеми со спиењето?
Вообичаено е децата на оваа возраст да не сакаат да одат во кревет и да се будат навечер. Многу деца имаат кошмари и поради тоа не можат да заспијат.
Ако детето се буди во текот на ноќта и ве вика, обидете се да не одговорите веднаш. Дајте му шанса само да заспие, без ваша помош. Ако е исплашено и вознемирено, тогаш не го оставајте само, туку одете да му помогнете и смирете го. Кога ќе го смирите детето, објаснете му дека е време за спиење.
