Сиобан О’Керол од Ирска ги предупреди родителите да научат да ги препознаваат знаците на менингитис откако нејзината ќерка починала само шест часа по појавата на првите симптоми. Како што пишува „Ајриш Мирор“, мајката била во болница поради зачувување на бременоста кога ѝ се јавил сопругот Ноел, кој се пожалил дека нивната четиригодишна ќерка не се чувствува добро. Тој и рекол дека повраќа и има дијареја и дека мисли дека има вироза, но по неколку часа сепак решил да се јави на брза помош.
„Им се јавил и им кажал дека е загрижен. Наместо да реагираат, му рекле да се погрижи да не дехидрира и да дојде наутро ако нема подобрување. Го прашале дали и пречи силна светлина, на што тој одговорил дека не и пречи. Тоа беше тоа“, изјавила Сиобан, која не ни насетувала дека само неколку часа подоцна ќе го добие најлошиот повик во нејзиниот живот.
„Ноел ми се јави повторно два часа подоцна, и рече само дека Аоибе ги затворила очите додека ја носел по скалите и дека брзата помош е на пат. Пред да го завршиме разговорот ми кажа дека не му е добро. Подоцна додека стоевме заедно во чекалната, видов како ни приоѓаат лекар и свештеник. Тогаш се ми беше јасно, ни кажаа дека нашето девојче повеќе го нема.
Менингитисот има и еден симптом кој дефинитивно не е вообичаен – а тоа е чувството на вкочанетост во вратот, односно неможноста на пациентот со брадата да ги допре градите
Само шест часа по почетокот на симптомите, нашата Аоибе почина од менингитис. Тоа беше шок што никогаш нема да можам да го опишам со зборови. Не морам ни да кажам дека нашите животи се сменија засекогаш од тој момент“, вели Сиобан, која би сакала да ги предупреди сите родители за болеста што го однесе нејзиното дете за само неколку часа.
„Немојте да чекате да биде прекасно, запознајте се со сите симптоми на менингитис, без разлика колку се различни. Кај него знаците можат да се појават буквално по секој редослед, па дури и да ги нема, но секогаш верувајте им на вашите инстинкти. Вие сте тие кои најдобро го познавате вашето дете и ако сте загрижени, веднаш побарајте лекарска помош“, додала мајката за „Ајриш Мирор“, која, како што вели, никогаш нема да знае дали нејзината ќерка и понатаму би била со неа доколку реагирале на време.
Менингитисот е болест која треба да се препознае навреме
Кога се во прашање децата, особено малите, симптомите на менингитис многу брзо се влошуваат, а доколку не ги препознаете навреме, големи се шансите уште пред да побарате помош, да се развие сепса со фатални последици.
Уште една мајка Шерон Карвер гласно зборува за сите можни симптоми кои родителите мора да ги знаат, мора да бидат упатени, бидејќи кога се работи за менингитис многу е важно да се реагира навреме, а не да се чека ситуацијата да се смири.
Синот на Шерон, кој инаку бил здраво и активно дете, навечер се пожалил на главоболка, што не било вообичаено за него, но бидејќи самата главоболка, особено кај децата, повеќе се смета за симптом отколку за болест, му дале сируп против болки со надеж дека главоболката набрзо ќе помине. Но, набрзо симптомите му се влошиле – почнал да повраќа, бил видно малаксан, па дури тогаш го однеле во болница. Но, за жал, веќе било предоцна бидејќи менингитисот предизвикал тешка инфекција, настанала сепса и неговите органи почнале да откажуваат за само два дена.
Нешто страшно, за кое читаме овде-онде, но некако сите мислиме дека сепак им се случува – на другите.
И затоа е многу важно да се знаат сите симптоми кои укажуваат на оваа опасна дијагноза.
Пред сè, треба да знаете дека постојат неколку видови на менингитис. Секако најопасен е бактерискиот менингитис кој исто како и вирусниот менингитис се пренесува преку капки, а болеста се развива многу брзо и често остава фатални последици. Вирусниот менингитис има поблаги последици и детето веќе се чувствува многу подобро по 7-10 дена, без специфичен третман.
Но, кога станува збор за бактериски менингитис – ситуацијата е многу полоша и посложена. И токму затоа е потребно да се знае кои симптоми се типични за оваа ретка, но страшна болест.
Првите симптоми се обично главоболка, повраќање, малаксаност, покачена телесна температура, болки во зглобовите, кај бебињата се забележуваат ладни раце и нозе (класичен знак за покачена телесна температура)… ова сето заедно всушност звучи доста често за многу класични заболувања – од грип до цревни вирози.
На кожата често се појавува и осип, кожата на децата може да биде невообичаено ладна, децата може да одбиваат да јадат, пијат, плачот може да биде невообичаено тивок, но присутен. Значи, симптоми кои можат да укажуваат на најлошото, но сепак бидејќи секое дете е индивидуално, понекогаш е тешко на самиот почеток да се утврди дали тоа се навистина симптоми на оваа зла болест.
Но, менингитисот има и еден симптом кој дефинитивно не е вообичаен – а тоа е чувството на вкочанетост во вратот, односно неможноста на пациентот со брадата да ги допре градите.
Доколку забележите вакво нешто кај вашето дете, при вакви класични симптоми, задолжително веднаш посетете лекар.
