Секое човечко битие родено на оваа планета не е во целост „свое“. Еден мал дел од нашите клетки – приближно една во милион – всушност не е наш, туку потекнува од нашите мајки. Тоа значи дека секој од нас во себе носи милиони клетки кои нашиот имунолошки систем вообичаено би ги препознал како страно тело, па сепак, кај повеќето од нас, тие престојуваат мирно, не предизвикувајќи никакви имунолошки проблеми.
Имунолозите сега открија зошто е тоа така. Мал број мајчини имунолошки клетки кои ја преминуваат постелката (плацентата) за време на бременоста, активно го „тренираат“ имунолошкиот систем на фетусот да ги толерира мајчините клетки во текот на целиот живот.
Биолошка врска што трае вечно
Размената на клетки помеѓу мајката и фетусот е добро документиран феномен за кој научниците знаат повеќе од 50 години. Се нарекува микрохимеризам и функционира во двата правци: секоја жена што била бремена ги задржува клетките од својот фетус, а секое човечко битие ги задржува клетките на својата мајка.
Овие преостанати клетки претставуваат енигма за имунологијата, која се заснова на идејата дека имунолошкиот систем треба да ги напаѓа туѓите клетки.
Научно истражување
Тимот предводен од Синг Синг Веј, специјалист за педијатриски инфективни болести од Детскиот болнички центар во Синсинати, сакал да разбере како тие „туѓи“ мајчини клетки го држат имунолошкиот систем под контрола и каква улога играат во обликувањето на имунолошкиот систем на фетусот.
Ова истражување нуди нови алатки за разбирање на различни болести, вклучувајќи ги автоимуните болести, ракот и невролошките нарушувања, со кои микрохимеризмот сè почесто се поврзува
Истражувачите го проучувале мајчиниот микрохимеризам кај глувци. Тие одгледале глувци со генетски модифицирани имунолошки клетки за да можат селективно да ги отстранат и да видат дали толеранцијата ќе опстои.
Клучот е во „мировната полиција“ на телото
Кога истражувачите ги отстраниле тие специфични мајчини клетки кај потомството, резултатите биле драматични: регулаторните Т-клетки исчезнале, а со нив и имунолошката толеранција кон мајчините клетки.
Ова имплицира дека доживотната толеранција на овие клетки зависи само од една мала група мајчини клетки и дека таа толеранција мора активно и непрекинато да се одржува; тоа не е процес кој завршува еднаш засекогаш за време на бременоста.
Ова истражување нуди нови алатки за разбирање на различни болести, вклучувајќи ги автоимуните болести, ракот и невролошките нарушувања, со кои микрохимеризмот сè почесто се поврзува. Студијата отвора врата за истражување на тоа дали овие ретки клетки се причина за болестите или се наоѓаат во заболеното ткиво како дел од природниот процес на исцелување, пишува Science Alert.
