По повод Меѓународниот ден на здравјето, 7 април, Министерот за здравство, Венко Филипче се обрати до здравствените работници, на кои им оддаде признание за клучната улога која ја имаат во здравствената нега и грижата за нашето здравје.
„Драги колеги, ова обраќање ви го посветувам на вас, здравствените работници. Во овие моменти, исправени пред најголемиот светски здравствен предизвик ја водиме битката на нашата генерација. Коронавирусот од корен го измени нашето секојдневие и ќе направи трајни промени во нашите животи. Но, во оваа битка вие сте хероите. Вашиот труд и пожртвуваност спасуваат животи и токму заради вас луѓето веруваат дека ќе бидат безбедни и здрави.
Овој ден е ваш ден, вие сте на пиедесталот. Бидете горди на тоа што го работите, на тоа кои сте и колку сте значајни за секој од нас. Ви го честитам денот на здравјето и здравствените работници и искрено ви благодарам за се што правите да ја надминеме кризата
Сега, здравството и здравствените работници се клучниот столб во државата. Знам дека во моментов носите огромен товар. Заморот полека не стига сите, а не чекаат уште тешки денови. Но јас верувам дека секој од вас знае колку е важно да издржиме, да останеме посветени, сконцентрирани и да дадеме се од себе да им помогнеме на нашите сограѓани.
Драги колеги, сега е многу важно да се грижите за себе и за своето здравје. Вие сте први на удар на вирусот и морате да се штитите. Без исклучок, штитете се на работното место, но и надвор од него. Грижете се за себе, за да можете да и натаму да се грижите за пациентите. Овој ден е ваш ден, вие сте на пиедесталот. Бидете горди на тоа што го работите, на тоа кои сте и колку сте значајни за секој од нас. Ви го честитам денот на здравјето и здравствените работници и искрено ви благодарам за се што правите да ја надминеме кризата“, истакна Филипче во своето обраќање до здравствените работници.
