Веројатно и вие сте слушнале за теоријата дека на децата не треба да им се даваат млечни производи кога се болни, бидејќи наводно овие намирници го зголемуваат производството на секрет. Работата е во тоа да кога детето е болно, телото произведува повеќе секрети за побрзо да се ослободи од инфекцијата. Консумирањето на полномасно млеко може да го направи секретот во устата погуст, а бидејќи оралните и назални патишта се поврзани, може да изгледа како носот на детето да е повеќе затнат по пиењето млеко.
Меѓутоа, тоа не значи дека млекото навистина го зголемува производството на секрет. Еве што велат научните истражувања за тоа:
- Нема поврзаност
За потребите на едно истражување, научниците го измериле количеството на секрет кај 60 лица со настинка во период од 10 дена, а исто така било неопходно учесниците да пријават колку млеко испиле. Утврдено е дека не постои никаква врска помеѓу количината на секрет произведен во телото и консумирањето млечни производи.
- Сè е прашање на чувство
Еден тим научници избрал 169 луѓе на кои по случаен избор им било дадено млеко од соја или кравјо млеко, но така што учесниците не знаеле кој вид млеко го пијат. Се покажало дека оние кои пиеле млеко од соја пријавиле повеќе секрет во грлото, исто како и оние кои пиеле кравјо млеко.
- Една студија покажува поинаку
Една понова студија следела 100 луѓе, од кои некои биле на млечни производи, а други на диета без млечни производи една недела. Оние кои не јаделе млечни производи пријавиле помала назална конгестија, но некои научници теоретизираат дека луѓето со одредени генетски предиспозиции може да реагираат на млечните производи со производство на повеќе секрет во телото.
Сепак, треба да се нагласи дека овие студии биле мали и дека во нив учествувале возрасни и дека се потребни повеќе научни истражувања за да се утврди дали млечните производи имаат некакво влијание врз децата.
Што да правите
Не мора да го спречувате вашето дете да консумира млечни производи. Млекото содржи важни хранливи материи, има калциум и витамин Д, кои му се потребни на детето за развој. Исто така, може да помогне детето да биде хидрирано, што е многу важно при инфекции.
Ако забележите дека вашето дете кашла откако ќе испие млеко, обидете се да му дадете малку загреано млеко. Кај некои тоа помага, иако нема правила и не е научно докажано.
Побарајте начини за ублажување на назалната конгестија. Некои солени раствори за носот или навлажнувач на воздухот може да му помогнат на детето полесно да дише. Може да помогне и детето да спие на малку подигната перница, како и да јаде поладна храна која ќе го смири грлото.
Ако се сомневате дека вашето дете има алергија на млеко, побарајте совет од лекар. Некои симптоми на оваа алергија може да вклучуваат стомачна болка, дијареа или осип.
