Заспивањето на бебето може да биде предизвикувачка задача, а родителите се обидуваат на различни начини да го пронајдат оној кој најдобро функционира за нивното бебе. Овде, првенствено зборуваме за успивање на бебиња на возраст до три месеци. Имено, овие мали бебиња се уште ги паметат звуците кои ги слушнале во матката и се уште им се најдобар начин да се смират и да заспијат.
Како можеме на бебето да му прилагодиме околности кои ниту малку не се слични на оние во стомакот на мајката? Освен што ќе го нишате, ќе го повиете со ќебенце, постои уште еден трик кој е се попопуларен меѓу родителите. Новороденчињата едноставно обожаваат звуци како што се оние на фен или правосмукалка.
Сепак, тешко е да вклучите фен секогаш кога бебето оди на спиење и да го држите во близина за да може неговиот звук да има смирувачко дејство. Ако сте пребарувале на интернет, сигурно сте дошле до видео на Јутуб на кое има само бебе кое спие, како да ви дава надеж дека и вашето така ќе спие, со звук на фен во позадина.
Да, некои родители беа досетливи и се обидоа да ви олеснат успивањето на вашето бебе. На јутуб можете да најдете различни варијации на темата, а еве и зошто можеби ќе сакате да го испробате овој трик.
Зошто токму фен за коса?
Значи, како што веќе споменавме, бебето девет месеци било заштитено во вашата матка, а надворешните звуци биле пригушени. Но, тоа било изложено на различни звуци и шумови кои доаѓаат од вашето тело: слушнало како работи вашата дигестија, циркулацијата на крвта, чукањето на вашето срце… Замислете каков спектар на фина бучава е тоа.
И потоа доаѓа во свет каде што сите звуци се поинтензивни, појасни, попродорни, но секако му недостига онаа фина бучава со која се навикнало да одмора.
Звукот на фен влегува во спектарот на звуци кои се нарекуваат и “бел шум“ или “бела бучава“, а тоа е звук што содржи звуци од сите фреквенции кои се подеднакво распоредени во распонот на фреквентниот појас, нешто како бела светлина која е составена од континуирана низа на сите бои од видливиот спектар.
Всушност, белиот шум ги камуфлира останатите звуци од околината кои може да го вознемират новороденчето во спиењето, а исто така му дава чувство на познатото опкружување во матката бидејќи фреквенциски се совпаѓа со звуците што ги слушало 9 месеци.
