Добробитите од музичкото образование за децата одамна се познати. Тоа помага во развојот на емоционалната интелигенција, комуникациските вештини, емпатијата и способноста за решавање конфликти. Но, ново истражување покажува дека влијанието на музиката оди уште подлабоко – таа им помага на децата да бидат посреќни и повеќе поврзани, и со другите и со самите себе.
Според независно истражување спроведено за School of Rock на повеќе од илјада родители, дури 93% од родителите изјавиле дека нивните деца станале покреативни откако започнале да посетуваат музички програми.
85% забележале напредок во комуникацијата и самодовербата, 81% повеќе емпатија, а 80% велат дека нивните деца едноставно – се посреќни.
Речиси 88% од родителите истакнале дека нивното дете подобро се справува со неуспеси, додека 79% сметаат дека децата ја користат музиката како начин за смирување и изразување емоции.
Интересно е што музиката не ги поврзува децата само со нивните чувства, туку и со родителите – 87% од родителите рекле дека се чувствуваат поблиски со своите деца откако почнале да споделуваат музички моменти заедно.
„Музиката им ги менува животите на децата, и тоа го гледаме секојдневно,“ истакнува Стејси Рајан, претседателка на School of Rock.
Како музиката го обликува детскиот мозок и емоциите
Стручњаците се согласуваат дека децата кои се запознаваат со музиката пред осмата година од животот развиваат долгорочни предности во емоционалниот и социјалниот развој.
„Мозокот на малите деца буквално впива сè што слуша и гледа. Музиката ги зајакнува нервните мрежи кои се одговорни за емоциите, емпатијата и односите,“ објаснува д-р Анита Колинс, авторка на книгата The Music Advantage.
Но и постарите деца имаат корист – свирењето во бенд, пеењето во хор или заедничкото создавање музика го развива чувството на припадност и поврзаност со врсниците.
За децата со потешкотии во учењето, музиката може да биде клучен алат.
„Кога мозокот учи музика, тој создава нови патишта кои подоцна помагаат и во други области на учењето,“ додава д-р Колинс.
Музиката започнува дома
Родителите можат да ја поттикнат љубовта кон музиката и во секојдневието – преку заедничко пеење, плескање во ритам, истражување на инструменти или следење онлајн лекции.
За помалите деца тоа може да биде песна пред спиење, а за постарите – заедничко откривање нови песни што ги сакаат.
„Музиката не е само хоби. Таа е начин на кој нашите деца учат да се изразат, да ги разберат другите и да израснат во личности полни со самодоверба и емоции,“ заклучува Рајан.
