Жените со мигрена може да имаат поголем ризик од прееклампсија и други компликации во бременоста, сугерира нова студија во која учествувале околи 19.000 жени во период од 20 години. Инаку, 20 проценти од жените во фертилниот период имаат мигрена, но влијанието на мигрената на исходот на бременоста не бил добро разјаснет.
Се смета дека откривањето на врската помеѓу мигрената и компликациите во бременоста може да помогне во информирање на лекарот и жената со мигрена за потенцијалните ризици за кои би требало да бидат свесни.
Ова истражување покажало дека жените со мигрена имаат 17% поголем ризик од предвремено породување, 28% поголем ризик од гестациски висок крвен притисок и 40% поголем ризик од прееклампсија во однос на жените без мигрена.
Исто така се покажало дека ризикот од прееклампсија бил многу поголем меѓу жените кои имале мигрена со аура, при која пречките со видот се јавуваат пред главоболката.
Треба да се напомене и дека мигрената не била поврзана со гестацискиот дијабетес или ниската родилна тежина.
Иако ризиците од овие компликации општо се уште се ниски, жените со историја на кигрена треба да бидат свесни и да се консултираат со својот лекар за можните ризици во бременоста.
Истражувачите сметаат дека се потребни дополнителни истражувања за точно да се утврди зошто мигрената може да биде поврзана со поголеми ризици од компликации во бременоста. Во меѓувреме, жените со мигрена може да имаат придобивка од подеталното следење во текот на бременоста за компликациите како прееклампсија може да се идентификуваат и лекуваат што е можно побрзо.
