Нова студија на британски научници од Универзитетот Дарем открива фасцинантни сознанија за развојот на сетилата кај бебињата додека се во мајчината утроба. Со помош на напредни 4Д-ултразвучни снимки, за првпат се забележани изразени реакции на неродени бебиња на различни вкусови кои ги консумираат нивните мајки — и тоа во реално време.
Научниците ги набљудувале изразите на лицето кај стотина фетуси со гестациска старост од 32 до 36 недели, откако нивните мајки голтнале капсули со прашок од кељ или морков. Резултатите биле јасни: бебињата изложени на вкусот на морков често се „насмевнувале“, додека оние кои почувствувале кељ реагирале со гримаси слични на плачење.
„Беше неверојатно да се гледаат тие изрази во живо и да се споделат со родителите. За првпат можеме да видиме како бебињата реагираат на мириси и вкусови додека се сè уште во утробата“, истакна водителката на истражувањето, докторка на науки Бејза Устун.
Изложеноста на фетусот на различни вкусови, дури и на оние што возрасните често ги одбиваат, како кељот, може да помогне во намалувањето на детската пребирливост во исхраната подоцна во животот
Истражувањето ги потврдува долгогодишните претпоставки дека фетусот може да почувствува вкусови и мириси преку голтање и вдишување на амнионската течност. Но, досега сите докази доаѓаа од истражувања спроведени по раѓањето. Ова е прва студија што донесува директен визуелен доказ дека овие сетила се активни уште пред раѓањето.
Изложеноста на фетусот на различни вкусови може да ја намали пребирливоста кај децата
Експертите од Лабораторијата за неонатални и фетални истражувања сметаат дека исхраната на бремените жени може да влијае врз развојот на идните прехранбени навики на нивните деца. Професорката Наџа Рајсленд, коавторка на студијата, ги истакна потенцијалните придобивки: „Изложеноста на фетусот на различни вкусови, дури и на оние што возрасните често ги одбиваат, како кељот, може да помогне во намалувањето на детската пребирливост во исхраната подоцна во животот.“
Професорката Џеки Блисет од Универзитетот Астон додаде дека повторената изложеност на „неомилените“ вкусови уште во утробата, може да доведе до подобро прифаќање на тие намирници по раѓањето. „Планираме да истражиме дали негативните реакции се намалуваат со текот на времето, што би можело да отвори нови можности за оформување на поздрави прехранбени навики уште од најрана возраст.“
Студијата е објавена во научното списание Psychological Science и може да отвори ново поглавје во разбирањето на развојот на сетилата и важноста на пренаталната исхрана.
