Ситни делови, магнети, играчки што впиваат вода, како и електрични тротинети и велосипеди, можат да претставуваат сериозен ризик за здравјето на децата.
Новата година е пред нас, а продавниците се преполни со купувачи. Во потрага по совршен подарок за најмладите, родителите често избираат играчки кои во моментот се популарни или на попуст, без секогаш да размислат за можните ризици. Но токму во празничниот период лекарите и експертите за детска безбедност предупредуваат дека некои наизглед безопасни играчки можат да претставуваат сериозна опасност за здравјето на децата. Од ситни делови што може да се проголтаат, до електрични уреди кои ги надминуваат детските рефлекси и способности, одредени подароци бараат дополнителна претпазливост.
Родителите секогаш треба да ја проверат препорачаната возраст за играчката и да размислат за тоа како малите деца го истражуваат светот преку допир и ставање предмети во уста
Педијатриската физиотерапевтка д-р Алисон Мел и експерти за родителство за Дејли мејл ги издвојуваат играчките кои самите никогаш не би им ги купиле на децата и објаснуваат зошто родителите треба да ги избегнуваат или барем да ги користат под строг надзор.
Водени перли и магнети
Кога станува збор за детски играчки, особено опасни се малите делови кои можат да се проголтаат или вдишат. Посебно ризични се магнетните играчки и играчките што впиваат вода, како и малите перли.
„Овие мали перли можат да пораснат и до 100 пати од својата големина кога ќе впијат вода, а CPSC (Комисијата за безбедност на производи за широка потрошувачка) има документирано илјадници повреди, па дури и смртни случаи кај бебиња по нивно проголтување“, предупредува д-р Мел.
Кога станува збор за детски играчки, особено опасни се малите делови кои можат да се проголтаат или вдишат. Посебно ризични се магнетните играчки и играчките што впиваат вода, како и малите перли
Таа додава дека ваквите перли можат да се прошират во цревата и да предизвикаат опасни опструкции кои понекогаш не се видливи ни на рендгенските снимки. Овие играчки се особено опасни за бебиња што лазат и за мали деца кои го истражуваат светот ставајќи предмети во уста. Слична опасност, предупредува таа, претставуваат и магнетните играчки.
„Силните магнети можат да предизвикаат животозагрозувачки внатрешни повреди ако се проголтаат повеќе од еден, бидејќи можат да се спојат преку ѕидовите на цревата. Исто како и перлите што впиваат вода, лабавите магнети се исклучително опасни за бебињата и малите деца кои ставаат сè што ќе најдат во уста“, истакнува Мел.
Сетови за изработка на слајм и играчки од непознати производители
Опасни можат да бидат и слајм-играчките кои содржат мали перли, предупредува Емили Гринберг, коосновачка и тренер за родителство во Joy Parenting Club.
„Бидете внимателни и со непроверените или поевтините играчки, бидејќи можат да содржат штетни материјали или да бидат лошо изработени. Држењето до проверени брендови и читањето на етикетите е паметен начин за заштита на децата“, додава Гринберг.
Автомобили на далечинско управување
Опасностите не завршуваат со најмалите деца. Играчки како автомобили на далечинско управување можат да бидат ризични и за постари деца и тинејџери.
„Овие автомобили често имаат мали тркалца, антени или делови кои можат да се откачат за време на играта. За малите деца тие делови претставуваат сериозен ризик од гушење, додека постарите деца можат да се повредат од острите рабови на скршените делови. Родителите секогаш треба да ги прегледаат играчките пред да им ги дадат на децата, да ја надгледуваат играта и да избегнуваат автомобили со делови кои се вадат за помали деца“, нагласува таа.
Електрични тротинети и велосипеди
Слично на тоа, подарувањето електрични тротинети и велосипеди на постари деца може да биде опасно. Според истражување на Универзитетот на Калифорнија во Сан Франциско, повредите поврзани со електрични велосипеди се удвојуваат секоја година од 2017 до 2022 година, додека повредите од електрични тротинети растат за 45 % годишно.
„За постарите деца, електричните тротинети и велосипеди се исклучително популарни, но предизвикуваат голем број скршеници и повреди на главата поради брзината. Истражувањата покажуваат дека повредите кај децата поврзани со електрични велосипеди често вклучуваат сериозни трауми, а обичните велосипедски кациги не се наменети за поголемите сили на удар што ги создаваат овие уреди“, објаснува д-р Мел.
Ризици од кои децата не можат сами да се заштитат
На крајот, д-р Мел истакнува една заедничка карактеристика кај сите овие играчки – децата не можат самостојно да се заштитат од ризикот.
„Без разлика дали станува збор за голтање предмети што се шират, голтање магнети или возење уреди кои се движат побрзо отколку што нивните рефлекси и заштитна опрема можат да поднесат, сите овие подароци носат ризик. Родителите секогаш треба да ја проверат препорачаната возраст за играчката и да размислат за тоа како малите деца го истражуваат светот преку допир и ставање предмети во устата“, заклучува д-р Мел.
