Бронхитисот е состојба кога слузницата на големите дишни патишта се воспалува, односно набабрува и се зацрвенува. Овие дишни патишта се нарекуваат бронхијални цевки и го поврзуваат душникот со белите дробови. На нивниот внатрешен ѕид се формира слуз, која ги покрива и штити органите и ткивата важни за дишењето.
Бронхитисот може да го отежни протокот на воздух во и надвор од белите дробови. Исто така, може да ја иритира слузокожата на бронхиите, поради што се создава многу секрет. Имајќи го сето ова на ум, не е изненадување што најчест симптом на бронхитисот е упорната кашлица, пишува Kidshealth.org.
Видови бронхитис
Бронхитисот може да биде акутен или хроничен.
Акутниот бронхитис настапува брзо, ненадејно и може да предизвика сериозни симптоми, но обично не трае повеќе од неколку недели. Причина за бронхитис во повеќето случаи се вирусите, кои го инфицираат респираторниот тракт и ги напаѓаат бронхиите. Исто така, некои бактерии можат да бидат причина за бронхитис, а повеќето луѓе имаат акутен бронхитис барем еднаш во животот.
Хроничниот бронхитис се јавува поретко кај децата, може да биде поблаг или посериозен, а трае подолго – од неколку месеци до неколку години. Најчеста причина за хроничен бронхитис е пушењето. Бронхијалните цевки остануваат воспалени и иритирани, а се создава многу секрет. Луѓето кои имаат хроничен бронхитис се изложени на поголем ризик од бактериски инфекции на дишните патишта и белите дробови, како што е пневмонија.
Симптоми на бронхитис
Акутниот бронхитис обично започнува со сува, упорна кашлица предизвикана од воспаление на слузницата на бронхиите.
Други симптоми што може да се појават вклучуваат:
- Кашлица придружена со густ бел, жолт или зелен секрет
- Чувство на недостаток на воздух
- Болка или стегање во градите
- Свирење при дишење
- Главоболка
- Општо чувство на слабост
- Треска
- Треперење
Кај луѓето со хроничен бронхитис, настинките и другите респираторни инфекции може да траат подолго. Свирењето, отежнато дишење и кашлицата може да се појавуваат секојдневно, а дишењето може да станува сè потешко.
Лекување на бронхитис
Антибиотиците обично не се користат за лекување на бронхитис, бидејќи оваа инфекција е предизвикана од вируси, а не од бактерии. Во повеќето случаи, домашно лекување на децата со бронхитис е доволно, а лекарот ќе препорача зголемен внес на течности и одмор.
Некои деца ќе имаат потреба од лекови за сузбивање на кашлица, за што ќе одлучи лекарот, а понекогаш се користат и лекови за астма за опуштање и отворање на бронхијалните цевки, исфрлање на секретот и олеснување на дишењето. Овие лекови обично им се даваат на децата со инхалација.
Дете со хроничен бронхитис треба да избегнува се што може да ги иритира бронхиите, а возрасните кои пушат треба да престанат да пушат. Чадот од тутун е причина за хроничен бронхитис во повеќе од 80 проценти од случаите, а пушачите потешко се опоравуваат од акутен бронхитис и други инфекции на респираторниот систем.
