Стручњаците истакнуваат дека постојат бројни начини со помош на кои на детето може да му го олесните разводот. Најчести грешки кои разведените родители ги прават, може да остават голема трага или негативно да влијаат на развојот на детето.
Детето не смее да биде “поштар“
Голем број разведени парови меѓусебно комуницираат преку детето. Сето тоа претставува голем емоционален стрес за детето. Детето се обидува да ја совлада ситуацијата за која неговите родители не се способни. Денес постојат разни форми на комуникација, па затоа нема потреба своето дете да го користите како комуникациско средство. Важно е меѓусебно да се договарате околу одгледувањето на детето, а притоа да не поттикнувате караница за проблемите од минатото. Ако со партнерот мора да зборувате преку телефон, или пак лично, фокусирајте се исклучиво на темата за која мора да зборувате. Заборавете ги проблемите од минатото, бидејќи не сте во прашање вие, туку вашето дете. Не заборавајте дека емоционалното здравје на детето зависи од тоа.
Детето не е ваш терапевт
На децата, особено на адолесцентите, потребно им е чувство на контрола и сигурност. Нивниот свет многу лесно може да стане несигурно место по разводот на родителите. Во нивните очи секогаш мора да делувате силно и авторитативно, колку и да ви е тешко. Вие сте тука ним да им помогнете, а не тие вам. Затоа од голема важност е пред детето да не изнесувате грижи кои не го засегаат, а тоа се дефинитивно проблемите околу разводот. Не очекувајте дека детето ќе ве утеши и ќе ви даде совет.
Не се обидувајте детето да го придобиете на своја страна
Пред се, сфатете дека детето никогаш не смее да ги гледа родителите како одвоени страни, дури и тогаш кога се разведени. Во одгледувањето секогаш мора да бидете едно. Колку и да е тешко, не критизирајте го партнерот пред детето. Не му го наметнувајте му на детето свое мислење, тоа е единствена личност и има право на свое мислење, без оглед на тоа дали се согласува со вашето или не.
Поправете ја штетата што сте ја направиле
Многу разведени родители ќе забележат дека правеле некои од овие грешки. За среќа, никогаш не е доцна сето ова да го поправите и на детето да му овозможите нормален емоционален развој. Иако не забораваат веднаш, сепак децата сфаќаат, колку и да звучи неверојатно. Ако сте направиле некоја од овие грешки, важно е да го направите следното:
- Извинете се – Детето нека сфати дека и вие може да згрешите и дека сте подготвени да признаете. Ова е одлична порака за нивните постапки во иднина.
- Објаснете му ги деталите – Мора да бидете јасни во тоа зошто се извинувате, но и да ветите дека во иднина нема така да се однесувате.
