Грипот е обична вирусна болест која не е опасна за децата
- НЕ Е ТОЧНО!
Грипот не е обична вирусна болест, тоа е опасна вирусна болест, а особено е опасна за децата, особено за малите деца. Грипот е на врвот на листата на вируси кои ги напаѓаат органите за дишење, тој е микронапаѓач кој може да доведе до сериозни компликации.
Детето не може да добие грип ако не оди во градинка и најдобро е до пролет да седи дома
- НЕ Е ТОЧНО!
Детето може да добие грип и дома (го носат возрасните) или при прошетка во некој затворен трговски центар, во јавен превоз, на родендени… Затоа е неприфатливо детето да седи дома 4-5 месеци. Тоа би значело ставење во стаклено ѕвоно. Детето треба нормално да живее, да се движи и да оди во градинка.
Штом фати грип, на детето треба веднаш да му се даде некој антибиотик, за секој случај.
НЕ Е ТОЧНО! И ова не треба да се прави.
Ширењето на вирусот не може да се спречи со антибиотик. Причината е едноставна – антибиотиците не убиваат вируси, туку бактерии. Факт е дека при грип може да се очекуваат компликации кои се лекуваат со антибиотик, но тоа не се прави однапред.
Болеста кај детето може да помине и без компликации, а ако се случат “под антибиотик“ детето ќе треба да се префрли на друга посилна терапија. Затоа одлуката за евентуална антибиотска терапија ја донесува педијатарот.
Штом падне температурата, детето може веднаш да се носи во градинка или да оди во училиште
- ТОА НЕ Е ДОБРО ЗА ДЕТЕТО!
Грипот е болест која бара детето убаво и целосно да оздрави, пред враќањето во колектив. Треба да се знае дека инфлуенцата значајно ја слабее одбранбената (имунолошка) способност на детето. Во борбата со вирусот, детето до крај се исцрпува, па по прележување на болеста е поприемчиво и за други болести.
Во текот на зимата владеат и други вируси, но и бактерии, кои лесно се накалемуваат по вирусот на грип, кој зад себе оставил ослабен имун статус.
Од друга страна, немањето температура не значи и дека болеста целосно поминала. Дури по поправање на општата состојба на детето и враќање на апетитот, детето се зајакнува и е подготвено за акција. За ова се потребни неолку деба, па повеќето деца треба да паузираат седум до десет дена од последниот ден на зголемена телесна температура.
