Со желба да поминете прекрасен ден во природа сте ги презеле сите мерки на претпазливост )облека со долги ракави, репеленти, заштита за миленичето…), но враќањето дома не значи дека опасноста поминала. Колку и да сте биле внимателни, постои можност да не сте го избегнале неговото касање.
По враќањето дома проверете ја косата на сите членови на семејството, не само да децата. Детално проверете го и миленичето.
Ако сепак сте пронашле крлеж на кожата, ваша или на детето, ова се најважните работи кои мора да ги направите.
ИЗВАДЕТЕ ГО ВЕДНАШ И НИКАКО НЕ ПРЕМАЧКУВАЈТЕ СО МАСЛО
Доколку сте воочиле крлеж на кожата важно е што побрзо да го извадите – ризикот од инфекција е поголем колку подолго крлежот е прицврстен. Полесно е да се отстрани во првите неколку часа по убодот.
Веднаш треба да го извадите со пинцета. Фатете го што поблизу до главата, до кожата и со лесно повлекување извлечете го од кожата. Со ништо не го премачкувајте крлежот (алкохол, крема, масло, лак за нокти и слично) или да го “палите“ со пламен. Крлежот не го повлекувајте нагло, бидејќи така се предизвикува негово грчење и засилено излачување на поголема количина секрет и предизвикувач на болести во човековото тело ако крлежот е заразен, па на тој начин полесно се пренесува заразата. Ако не сте сигурни дека сте го отстраниле целосно или не знаете како, отидете на лекар.
ТУШИРАЊЕТО НЕ ПОМАГА
Туширањето со силен млаз вода веројатно е првата работа која интуитивно ќе ја направите ако ви се причини дека крлежот е под детската или вашата кожа. Ова е добра одлука ако навистина има крлеж кој се уште бара најдобро место на вашето тело на кое ќе се фати. Ако веќе е прицврстен, туширањето нема да помогне.
Бањата е идеално место на кое може да го направите прегледот на кожата ако се сомневате на крлеж. Прегледајте го со огледало секој сантиметар на кожата – од прегибите меѓу ножните прсти, до папокот и се до места на телото кои никогаш не биле изложени.
НЕ ГМЕЧЕТЕ ГО КРЛЕЖОТ
Во текот на оваа постапка може да се заразите бидејќи се јавува интензивно излачување на поголема количина на секрет. Имајте го на ум следново: ако сте го извадиле од кожата овој натрапник, не е лошо да го сочувате и да го однесете на анализа, ако се појават сомнителни симптоми на Лајмска болест.
АКО НЕ СТЕ ПОЧУВСТВУВАЛЕ КАСНУВАЊЕ, ТОА НЕ ЗНАЧИ ДЕКА СТЕ ГО ИЗБЕГНАЛЕ
Повеќето луѓе не чувствуваат дека ги каснал крлеж, а тоа е “благодарение“ на неговата плунка која делува како благ анестетик. Можеби дури и ќе можете да откриете дека вас или детето ве каснал возрасен крлеж, но кога ќе ве касне крлеж со големина на ситно афионово семе, веројатно ќе го превидите. Ова минијатурно суштество ќе остане на вашето тело и ќе се храни со денови.
НЕГАТИВНИОТ НАОД ЗА ЛАЈМСКАТА БОЛЕСТ НЕ ЗНАЧИ ДЕКА СТЕ НАДВОР ОД ОПАСНОСТ
За жал, се уште не сте надвор од животна опасност, дури и ако крвната анализа покаже дека сте негативни на причинителот на Лајмска болест. Ако имате симптоми кои се совпаѓаат со оние на Лајмската болест, треба да побарате второ мислење. Лајмската болест не е лесно да се дијагностицира бидејќи вообичаените симптоми, како што се главоболки, болки во зглобовите и заматен вид, лесно може да се помешаат со симптомите на грип или некоја друга инфекција. Од друга страна, осипот карактеристичен за Лајмската болест се јавува кај помалку од половина од случаите на заразени лица.
