Секоја личност кога ќе добие дете сака да биде што подобар родител, што е сосема нормално. Сепак, сите знаеме и дека родителството е тешко, па затоа треба да запомниме дека не постои совршен родител и дека секој од нас понекогаш прави грешка.
Децата не се свесни што чувствуваат, не умеат тоа да го опишат затоа што не знаат што е тоа. Само ако им опишете што чувствуваат, ќе постигнете децата да бидат свесни за тоа
На пример, некогаш им викаме на малите, некогаш кажуваме нешто за што во истиот момент сфаќаме дека не сме требале да го кажеме, но треба да обратиме внимание на некои работи кои можат да направат долгорочна штета.
Детскиот психолог, професорот Сем Вас за „Мирор“ го откри најлошото нешто што родителите можат да им го кажат на децата и зошто тоа треба да се избегнува.
Не им кажувајте на децата да не го чувствуваат она што го чувствуваат
Професорот открил дека најлошо е да им кажете на децата да не ги чувствуваат нивните емоции – без разлика дали се работи за тага, гнев или нешто трето.
„Забранувањето на емоциите не функционира. Не помага кај возрасните и дефинитивно не функционира ниту кај децата, не можете да му кажете на некого да укине одредена емоција“, вели професорот Вас.
Психологот вели дека вакви примери најчесто гледа на почетокот на учебната година, кога родителите ги носат децата прв ден на училиште.
„Нивното дете е во солзи, а родителот оди покрај него и со весел тон му зборува: „Се ќе биде во ред, немој да се плашиш, овде ќе ти биде убаво“.
Тој смета дека ова воопшто не помага и дека наместо да им зборуваат на децата дека не треба да го чувствуваат тоа што го чувствуваат, треба да се обидат да му објаснат на своето дете какви се емоциите што ги чувствува.
„Она што помага е да му опишеме на детето што би можело да чувствува“, вели професорот Сем, додавајќи дека тоа ќе му помогне на малечкото да ги разбере своите чувства.
„Децата не се свесни што чувствуваат, не умеат тоа да го опишат затоа што не знаат што е тоа. Само ако им опишете што чувствуваат, ќе постигнете децата да бидат свесни за тоа“.
Психологот истакна дека свесноста за она што го чувствуваме може да ни помогне полесно да управуваме со нашите емоции.
„Она што јас би го направил како родител е да му помогнам на моето дете да развие свесност за она што го чувствува, но на начин кој е без осудување, на пример: „Мислам дека се чувствуваш вака…“. Вербализирањето на емоциите им помага подобро да ги разберат и да научат што се одредени емоции“, заклучува професорот Вас.
