Нема дете кое барем еднаш во животот не ги излажало родителите. Без разлика дали се работи за голема или мала лага, тие можат да влијаат на довербата и односот помеѓу родителот и детето. Некои деца понекогаш не се ни осмелуваат да ја кажат вистината поради страв од бурната реакција на нивните родители.
За да се спречи тоа да се случи и односот меѓу родителите и децата да биде искрен, родителите наместо да викаат и да се расправаат со своите деца, треба да се однесуваат на еден од овие начини кога ќе ги фатат во лага.
„Сакам да си веруваме еден на друг“
Кога родителите ќе го фатат детето во лага, тие треба да ја истакнат важноста на довербата во нивната врска уште од самиот почеток. Фразата „Сакам да си веруваме еден на друг“ ја нагласува важноста на таа доверба без осудување, пишува The Times of India.
Довербата е основа на секоја врска, особено на онаа помеѓу родителите и децата. Затоа е важно децата да знаат дека дури и во ситуации кога лажат, имаат некого на кого можат да му се доверат и да ја откријат вистината без страв од осуда, тешка казна или слично.
„Храбро е да се каже вистината“
Поттикнете ја храброста со тоа што ќе нагласите дека кажувањето вистина бара храброст. Овој пристап се фокусира на позитивна поткрепа, пофалувајќи ја искреноста како добра и вредина особина вредна за пофалба кај секој поединец. Децата често лажат од страв, па затоа е важно да ги поттикнете да ја кажат вистината за да го надминат овој страв.
„Во ред е да се прават грешки, а преземањето одговорност е знак на храброст“
Како што пишува The Times of India, родителите треба да го уверат своето дете дека грешките се нормален дел од животот. Треба да нагласат дека е во ред да грешиме, се додека сме спремни да признаеме дека сме згрешиле. Ова ги учи децата на важноста да преземат одговорност за своите постапки. Исто така, им се помага да разберат дека искреноста е важен дел од личниот развој и учење.
„Што те загрижи толку многу што реши да лажеш?
Наместо обвинувања, родителите треба да покажат сочувство и разбирање и да се обидат да откријат зошто нивните деца чувствуваат потреба да лажат. Прашање како „Што те загрижи толку многу што реши да лажеш? покажува интерес да ја разбере нивната перспектива, а не само да ги казни за лажење.
Овој емпатичен пристап може да им помогне на децата да се чувствуваат безбедно да ја кажат вистината и отворено да зборуваат за своите грижи, особено со своите родители.
