На возраст од околу седум до девет месеци, повеќето бебиња почнуваат да се движат самостојно – често ползејќи. Тоа им овозможува да ја истражат својата околина, да ја подобрат рамнотежата и координацијата и да ги усовршат вештините за снаоѓање во простор и воочување на потенцијалните опасности.
Неодамнешни студии откриле дека повеќе искуство со ползење помага вашето бебе да биде посигурно, со што се зголемуваат позитивните придобивки што ги има ползењето врз независноста на детето. Истражувачите од Универзитетот Отаго ја истражиле корелацијата помеѓу ползењето и способноста да се забележат потенцијални опасности додека се движат и откриле дека поискусните деца кои лазат е помалку веројатно дека ќе паднат, на пример во вода, ако ползат покрај базен.
Што ни кажува истражувањето?
Една од студиите, објавена во списанието Infancy, го проучувала ефектот што искуството со различни методи на движење го има врз избегнувањето на ненадејна опасност во просторот, како што е паѓање од повисока површина или удар во некој предмет во просторот.
Стручниот тим, предводен од д-р Каролина Бурнеј, го тестирал однесувањето на бебињата околу мал базен полн со вода, секако тестирањето било безбедно, а било симулирано како игра со бебиња и родители, за време на летните месеци.
Научниците имале две групи испитаници, родители и бебиња кои лазат -почетници и родители и бебиња – искусни лазачи. Резултатите покажале дека бебињата кои биле почетници во лазењето сè уште не развиле перцепција за просторот ниту воочувале потенцијална опасност, додека бебињата кои имале искуство со ползење од неколку недели го заобиколувале базенот со вода додека се движеле.
Научниците отишле и подалеку во своето истражување, па во истиот тест ги подложиле бебињата кои одат, оние кои имале пократко искуство со лазење и оние кои имале подолго искуство со лазење. И знаете ли што забележале? Да, бебињата кои имале подолго искуство со лазење, кога почнале да одат поумешно се движеле низ просторот, избегнувале потенцијално опасни пречки и имале подобра координација на движењата. Истражувањата покажуваат дека е корисно за бебињата да ползат и да ја истражуваат околината. Преку директен контакт со подот и поинаков поглед на светот околу нив, тие учат да препознаваат небезбедни површини.
