Министрите треба да размислат за вакцинирање на децата против коронавирус за да ги заштитат од „долг Ковид“, изјавија врвни британски научници.
Д-р Ентони Костело, педијатар и член на Независен САГЕ, предупреди дека експертите сè уште се збунети од долгорочните компликации на болеста, за кои се смета дека не претставуваат непосредна закана за младите.
Тој ги опиша децата како „многу посебна ризична област“ затоа што постои можност да се соочат со ефекти коишто ќе траат со децении.
Децата во моментов не се на приоритетниот список за вакцинирање во Британија бидејќи одобрените вакцини се докажани само за блокада на симптоматска болест и тешки напади на болеста што може да се покажат како фатални, а ниту еден од нив се чини дека не влијае на помладите од 18 години.
Младите едвај се разболуваат и статистичарите пресметале дека имаат поголем ризик да бидат погодени од гром отколку да умрат од COVID-19.
Идејата дека децата се помалку подложни се заснова на многу ограничени, недоволни податоци. Со многу подобри студии сега знаеме дека децата играат многу, многу важна улога во пренесувањето. Гледајќи ги податоците од целиот свет, е многу јасно дека затворањето на училиштата е една од најефикасните мерки за намалување на репродукцискиот број Р
Д-р Костело рече дека студиите сугерираат дека Владата треба да размисли за вакцинирање на децата за да ги заштити од долг Ковид.
Тој додаде дека истражувачите откриле дека 15 проценти од учениците во средните училишта и 13 проценти од децата во основно училиште сè уште имале симптоми на коронавирус и пет недели по заразувањето.
„Загриженоста е во следново: ние навистина не го разбираме долгиот Ковид и што навистина тој значи. Не знаеме колку трае овој вирус во телата на луѓето, па дури и во нивниот мозок“, рече д-р Костело.
Во Велика Британија има 19 милиони деца, вели д-р Костело, а ако останат незаштитени и ако се укинат правилата за заклучување, половина од нив би можеле да се заразат од вирусот, а милиони да страдаат од долг Ковид.
„Апсолутно не знаеме какви влијанија ќе има долгорочно“, рече тој.
„Дали треба да ги вакцинираме децата, дури и ако тие се група со најнизок приоритет? Ова прашање треба одново да оди на разгледување.“
Д-р Дипти Гурдасани, епидемиолог од Квин Мери, Универзитет во Лондон, додаде: „Сè уште не го разбираме долгиот Ковид… Со оглед на тоа, би било потполно невнимателно да ги ставиме децата на ризик. Можеби ова не е краткорочно заболување за многу луѓе, може да биде хронично заболување“.
Коментарот на д-р Костело доаѓа во моментот кога Борис Џонсон ги претстави плановите да се отворат училиштата од 8 март.
Но, експертите стравуваат дека овој датум е преран.
Советникот на САГЕ, професор Калум Семпл, предупреди дека Велика Британија „не е ни блиску“ до тоа да може повторно да се отворат училиштата, бидејќи секојдневните инфекции се уште се премногу високи, иако брзо опаѓаат.
Д-р Дипти Гурдасани вели дека училиштата „не се волшебни места каде што не се случува пренесувањето“.
„Идејата дека децата се помалку подложни се заснова на многу ограничени, недоволни податоци. Со многу подобри студии сега знаеме дека децата играат многу, многу важна улога во пренесувањето. Гледајќи ги податоците од целиот свет, е многу јасно дека затворањето на училиштата е една од најефикасните мерки за намалување на репродукцискиот број Р. Децата имаат два пати поголема веројатност да го донесат Ковид во домаќинството отколку возрасен… и имаат два пати поголема веројатност да заразат други луѓе во домаќинството отколку возрасните. Генерално, тие придонесуваат многу за пренесување во училиштата и во заедницата, што е многу јасно во глобалните докази – училиштата претставуваат огромна карика“, пренесува „Дејли мејл“.
