Колку пати сте слушнале мајки како воздивнуваат: „Ќе ме дотепате!“? Нема сомнеж, родителството е напорно – менување пелени, трчање по две мали деца истовремено и постојана грижа навистина можат да ве исцрпат… или можеби сепак не?
Излегува дека постои една посебна група мајки кои во просек живеат подолго од останатите – мајките на близнаци!
Според истражување објавено во 2011 година во списанието Proceedings of the Royal Society B, жените кои родиле близнаци живеат подолго од оние кои раѓаат по едно дете во бременост.
Научниците откриле дека жените кои природно зачнуваат и раѓаат близнаци уште од почеток се физички посилни, што се одразува и на нивната долговечност.
„Очекувавме сосема спротивен резултат“, признава истражувачката Шанен Робсон од Универзитетот Јута. „Мислевме дека ќе имаат пократок животен век, бидејќи човечкото тело не е ‘предвидено’ за носење близнаци. Но се покажа дека овие жени се исклучителни – физички посилни од просекот.“
Но, тоа не е сè. Студијата исто така покажала дека мајките на близнаци:
- имаат подолг репродуктивен период,
- побрзо закрепнуваат меѓу бременостите,
- во просек раѓаат повеќе деца од мајките кои имаат по едно дете по бременост.
Истражувањето анализирало податоци за жени од Јута од 19 век и открило дека мајките на близнаци имале во просек од 1,9 до 2,3 деца повеќе од оние кои раѓале по едно дете.
Секако, научниците ја земале предвид и повисоката стапка на смртност кај близнаците (што било потврдено во студија од 2007 година во болницата Челза и Вестминистер. Но дури и по прилагодувањето на тие податоци, мајките на близнаци и понатаму имале предност кога станува збор за долговечноста.
Тимот што го спровел истражувањето се надева дека дополнително ќе ја истражи оваа појава и ќе пронајде одговори кои би можеле да им користат на сите мајки.
„Ако успееме да идентификуваме што точно ги прави овие жени поздрави и поотпорни, можеби ќе најдеме начини да им помогнеме на сите мајки да живеат подолго и поздраво“, додава Робсон.
Сепак, постои една важна забелешка – ова истражување се темели на жени кои близнаци зачнале природно, уште во 19 век. Денес, со ИВФ и други методи на асистирана репродукција, ситуацијата може да биде поинаква.
Но, ако сте мајка која природно родила близнаци, науката вели дека ве очекува подолг живот. Значи, не само што сте завршиле двојна работа во една бременост, туку имате и поголеми шанси за долговечност… а кој знае, можеби и уште некој пар близнаци! Можете да оформите цел мал семеен музички состав – можностите се бескрајни.
