Бебешките ќебиња се прекрасен подарок кој сигурно ќе го добиете од некого. Бидејќи дојде постудено време, веројатно веќе размислувате дека е време да го искористите и да го покриете вашето малечко за да не му студи.
Меѓутоа, треба да знаете дека прераното воведување на ќебе или друга мека постелнина може да го зголеми ризикот од СИДС (синдром на ненадејна доенечка смрт). Најбезбедно е да почекате вашето дете да порасне за да му понудите ќебе или друга покривка, а еве како знаете дека е вистинското време.
Бидејќи бебето може да се задуши под ќебето, најбезбедна средина за негово спиење е голо креветче во кое нема покривка, браници, перници, плишани играчки и слични работи. Единственото нешто што му треба на бебето во текот на ноќта е чаршаф кој е цврсто вовлечен од сите страни.
И немојте да бидете во искушение од различните реклами кои нудат специјални душеци или други површини кои се продаваат за да се намали ризикот од СИДС, бидејќи не е докажано дека делуваат, а потенцијално можат да бидат и опасни.
- Кога можам да го покријам бебето со ќебе?
Не постои официјална возраст која се смета за целосно безбедна за употреба на ќебиња, јоргани или други покривки, но повеќето медицински експерти веруваат дека меката постелнина претставува мала опасност во креветчето за здрави бебиња по 12-месечна возраст, а идеално е да се на возраст од над 18 месеци.
Затоа е најдобро да го одложите покривањето на вашето бебе барем додека не наполни 18 месеци, бидејќи може да се заплетка во него, ако е помладо. По 18 месеци, може да се користи тенко ќебе и мала покривка, па дури може да станат важен дел од рутината на успивање.
Исто така, имајте на ум дека меката постелнина сè уште не е дозволена, дури и ако планирате да го ставите бебето да лежи на ќебето, а не под него. Сè уште може да се замотка околу него додека се движи во сон.
- Како да го загреам моето бебе без ќебе?
Ако сте загрижени дека на бебе му е студено, а е помладо од 12 или 18 месеци, можеби најдобро решение е да користите вреќа за спиење. Ова едно парче е направено за да го покрие телото на вашето бебе, но не и неговата глава.
Ако вашата куќа или собата на бебето е исклучително топла, можеби и нема да му треба дополнителен слој. Идеалната температура за добар сон е помеѓу 20 и 22 степени, во сите годишни времиња. Прегревањето на бебето исто така може да го зголеми ризикот од СИДС.
Ако се прашувате како можете да знаете дали на бебето му е топло ноќе, допрете го задниот дел од нејзината глава. Кожата која е ладна на допир покажува дека му треба уште еден слој, а ако кожата е топла или забележите дека бебето се поти, тогаш му е претопло.
