Кога некаде брзаме и ни е важно детето да направи нешто, неговото двоумење или бунт често не наведува на употреба на сила, што понекогаш се чини дека е единствената опција да го постигнеме она што го сакаме. Проблемот е што силата и обидот за контрола често само го зголемуваат отпорот на детето и станува уште поупорно во својата намера. Децата го сакаат чувството на контрола и можноста за избор, а кога ќе почувствуваат дека сме на нивна страна, ќе бидат соработливи, потенцираат експертите за детски развој.
- Претворете ја ситуацијата во игра
Замислете ситуација кога детето не сака да облече јакна, а надвор е ладно. Ова е честа причина за расправии меѓу децата и родителите. Во таква ситуација, обидете се да се фокусирате на она што му е дозволено на детето и кажете му дека ќе излезе без јакна кога е сончево или потопло. И покрај тоа што нема веднаш да го добие она што го сака, вие сте му ветиле нешто кое му значи.
Предложете му на детето да излезете на балкон без јакна неколку минути и дајте му можност да го открие вистинското чувство на студ. Кога им даваме шанса на децата сами да се уверат во она што им кажуваме, тоа им помага да ги разберат нашите намери.
Бидете разиграни. Кога овие постапки им се прикажуваат на децата како обврски, нивниот отпор се зголемува. Направете ја оваа ситуација можност за игра и поврзување. Кажете му на детето дека ќе ги затворите очите и дека ве интересира дали може да ја облече јакната пред да ги отворите повторно.
- Покажете им дека ги разбирате
Разговарајте со децата за нивниот отпор. Кажете им дека разбирате дека не сакаат да носат јакна, но дека ве интересира зошто е тоа така. Дали им е премногу топло во јакната или нешто на неа им пречи? Ваквите разговори му покажуваат на детето дека се грижите за неговото мислење и дека сакате да му помогнете.
Поставете јасни граници и кажете му на вашето дете дека разбирате дека денес не сака да носи јакна, но дека ќе излезете штом ќе ја облече. Ако користите зборови во кои децата можат да препознаат дека имаат право на избор во тој момент, ќе си ја олесните предизвикувачката ситуација.
