Да се биде родител е возбудлива животна авантура со подеми и падови, изненадувања и среќни моменти. Меѓутоа, да се биде родител во никој случај не е лесна задача. Покрај постојаниот притисок од околината, родителите сами себе си создаваат притисок за тоа какви родители се. Понекогаш претерано го анализираат своето однесување и за зло го земаат она што можеби не би требало.
Родителството е тешко, а ова се некои од најчестите факти за родителството поради кои родителите се чувствуваат виновни, а навистина не би требало.
Нема секогаш да можете да контролирате сè
Родителите не можат секогаш да контролираат сè. Понекогаш нема да можете да го смирите детето кое има излив на бес или да влијаете на слична ситуација. Неопходно е родителите да се помират со фактот дека понекогаш ќе мора да се препуштат на ситуацијата која не можат да ја контролираат, за да не бидат под непотребен стрес, честопати фрустрирани и да се чувствуваат немоќни.
Често ќе чувствувате вина
Сите родители барем еднаш во животот се почувствувале виновни за начинот на кој зборувале или се однесувале кон своите деца. Родителите треба да си признаат дека се само луѓе и да ги прифатат своите грешки и да се обидат да не ги повторат. Исто така, родителите не треба да дозволат чувството на вина да ги надвладее безбројните моменти на љубов и грижа што им ги пружаат на своите деца.
Во ред е ако го немате ист родителски „стил“ на воспитување
Ниту еден родител не е ист, ниту два родителски стила се сосема исти. Она што е добро за едно семејство можеби не мора да биде добро за друго, и тоа е сосема во ред. Родителите треба да им веруваат на своите инстинкти и во соработка со партнерот да ги најдат најдобрите методи кои ќе помогнат во воспитувањето на децата.
Ќе се чувствувате лошо ако сакате пауза, а не треба
Препознавањето на потребата за пауза е знак на самосвест и грижа за себе на кои повеќе родители треба да обрнат внимание. Без разлика дали станува збор за кафе пауза без децата или брзо патување за време на викенд, одвојувањето време за себе е клучно за да го задржите вашиот разум и да ви помогне да бидете подобар родител бидејќи вашето расположение има огромно влијание врз вашите деца. Многу родители се чувствуваат лошо само што помислуваат да направат „пауза“ од своето семејство, но паузата понекогаш е повеќе од потребна.
Страв од несовршеност
Сите грешиме, а тоа е она што не прави луѓе и не е поинаку кога ќе станеме родители. Колку и да се трудите, понекогаш ќе донесете лоши одлуки за кои ќе зажалите, но на секоја несовршеност можете да гледате како на животна лекција. Родителите треба да се откажат од притисокот секогаш да бидат совршени. Откако ќе прифатат дека повремено ќе грешат, ќе се чувствуваат многу подобро и ќе се чувствуваат помалку виновни.
