Трудниците девет месеци се грижат за себе, за своето здравје и за своите навики, со нетрпение чекајќи го моментот кога ќе го запознаат своето бебе. Жените генерално знаат дека пукањето на водењакот и другите знаци најавуваат дека се приближува породувањето, но она што не го знаат е дека и некои неочекувани сигнали може да укажат дека се приближува породувањето.
Еве неколку „чудни“ знаци дека породувањето е поблиску отколку што мислите.
Почнувате да чистите… опсесивно
Повеќето трудници слушнале за „инстинктот за гнездење“, поради кој жените инстинктивно ја организираат својата околина кон крајот на бременоста, обидувајќи се да ја направат побезбедна, попријатна, смирувачка, но многумина не знаат колку таа може да стане интензивна.
На пример, некои мајки чувствуваат потреба да ја исчистат куќата пред да се породат, како нивното тело да им кажува дека сè треба да биде совршено пред да дојде бебето.
Значи, ако одеднаш започнете длабинско чистење на места за кои не сте размислувале со години, тоа може да биде знак дека бебето е на пат.
Многу сте чувствителни
Во ред, трудниците можат да бидат поемотивни од вообичаено поради хормоните, но оваа емоционална чувствителност пред породувањето е ново ниво. Тој емотивен тобоган може да биде знак дека породувањето е близу, и дека телото се подготвува за тој голем момент.
Имате желба за чудна храна
Желбата за одредена храна е вообичаена за време на бременоста, но непосредно пред породувањето работите можат да станат прилично бизарни. Некои мајки одеднаш сакаат многу зачинета или слатка храна еден или два дена пред породувањето, што можеби е начин на телото да ја бара потребната енергија за породувањето.
Се чувствувате како да сте настинати
Некои идни мајки информираат дека неколку дена пред породувањето биле исцрпени, им течел нос и се чувствувале слично како кога настинале. Немаат енергија, имаат чудно чувство, но тоа е всушност начинот на кој телото им кажува на некои жени да забават и да се одморат пред некој голем настан.
Имате многу енергија која брзо се исцрпува
Можно е да се разбудите полни со енергија, да направите неколку работи со голем ентузијазам, а потоа да морате да легнете бидејќи немате сила ниту да направите чекор. Ова нагло зголемување и нагло намалување на енергијата може да биде уште еден суптилен знак дека породувањето е „зад аголот“, и дека телото се подготвува на овој начин.
Верувајте му на вашето тело
Секоја бременост и раѓање е единствена, но вашето тело точно знае што прави. Затоа, верувајте им на вашите инстинкти и слушајте го вашето тело – ако ви каже дека е време за одмор, легнете.
