Мачнините се смирија, телото се навикна на лудувањето на хормоните и се полека станува нормално. Таман почнавте вистински да уживате во бременоста, ете го – стаса третото тромесечје.
Добрата работа секако е фактот дека наскоро ќе дојде денот за запознавање со љубовта на вашиот живот.
Не толку добрата работа е што од ден на ден дури и најбаналните работи за вас стануваат тешки како нуклеарна физика.
Притоа не игра преголема улога ни тоа колку сте фит, дали сте ниски или високи, па дури ни како сте ја издржале бременоста досега. Кога стомакот ќе се заобли, бебето зазема добар дел од просторот во вашето тело, а некои работи навистина стануваат тешки. Во продолжение, дел од нив…
ХРАНА
Ако не ве тиштат мачнини и чезнеете за храна, во третото тромесечје и храната ќе почне да ве нервира. Како што расте вашето бебе, има се помалку и помалку простор во вашиот стомак. Притисокот често ве спречува да изедете било што, па дури и кога можете да јадете, тоа се само неколку залачиња, бидејќи просторот е многу помал од порано. Ова е главна причина зошто понекогаш ви изгледа дека постојано јадете. Многу малите оброци се единствениот начин да се преживее овој период на бременоста.
СПИЕЊЕ
Ви се спие, а не можете да заспиете. Има ли нешто пофрустрирачко од ова чувство? Речиси е невозможно да се наместите во креветот, а токму кога ќе ја најдете идеалната позиција, се јавува мочниот меур и повторно мора да станете. Доколку сте во можност искористите ја секоја прилика за дремнување во текот на денот, бидејќи ноќите во последното тромесечје за повеќето бремени жени се резервирани за вртење во креветот и одење во тоалет.
Порано сонувавте само да легнете на каучот и да уживате во омилениот филм, но сега тоа е речиси невозможно. Додека да се смирите, ќе мора да одите тоалет или вашето бебе ќе почне да клоца. Болките во грбот, грчевите, ненаспиеноста, гладот и жедта во комбинација ретко оставаат простор за доброто старо излежување
СВИТКУВАЊЕ
Настрана од фактот што навистина не можете да се истегнете и да дофатите некои работи, обувањето на чевли, лакирање на ноктите на нозете и депилирањето стануваат навистина невозможна мисија.
ОДМОР
Како да се одморите кога не можете нормално да легнете, кога не можете да заспиете и цело време се чувствувате се поуморно и поуморно. Тешко е да се најде сила да се отиде и до тоалет, па каде е тогаш оној труднички сјај и блескање за кое сите зборуваат? Дури и кога ќе легнете да се одморите, невозможно е да се свртите, придвижите или да станете.
Единствената утеха е што веќе го поминавте најголемиот дел од патот, а и нема враќање назад.
