Нова француска студија предупредува дека децата во таа земја се изложени на високи нивоа на тешки метали и акриламид преку секојдневната исхрана, како што се житарките, пекарските производи, лебот и рибата.
Истражувачите укажуваат дека децата во Франција, преку својата вообичаена исхрана, се изложени на високи нивоа на тешки метали и други хемиски загадувачи.
Новата студија на Француска агенција за безбедност на храната, животната средина и трудот (ANSES) – под назив EAT3 – покажала дека кадмиумот, алуминиумот и живата претставуваат значителни здравствени ризици. Загриженост предизвикуваат и оловото и акриламидот, соединение што настанува при подготовка на храна на високи температури, пренесува Euronews.
Кадмиумот најчесто бил откриен во житарките за појадок, алуминиумот во пекарските производи и слатките бисквити, оловото во лебот, живата во рибата, а акриламидот во пржениот и динстаниот компир
„Овие почетни резултати го претставуваат првиот дел од TDS3 (Total Diet Study – Истражување на вкупната исхрана)“, изјави Морган Шампион, координаторка на студијата. „Деловите што се однесуваат на други групи контаминанти во храната ќе бидат објавени во наредните неколку години. За секоја група ќе формулираме посебни препораки, првенствено насочени кон намалување на изложеноста на овие контаминанти.“
Резултатите ја одразуваат и пошироката загриженост во Европа поврзана со загадувањето на храната.
КАКО Е СПРОВЕДЕНО ИСТРАЖУВАЊЕТО?
Истражувачите собрале повеќе од 700 примероци храна од супермаркети и пазари во три француски региони – Еро (Hérault), Лоаре (Loiret) и Пјуј-де-Дом (Puy-de-Dôme) – во периодот од мај 2021 до август 2022 година.
Примероците опфатиле повеќе од 90 проценти од типичната француска исхрана и биле подготвени на начин на кој вообичаено се консумираат, пред да бидат тестирани за присуство на контаминанти. Резултатите потоа биле комбинирани со податоци за потрошувачката на храна, со цел да се процени изложеноста на населението и потенцијалните здравствени ризици.
КАДЕ СЕ ПРОНАЈДЕНИ КОНТАМИНАНТИТЕ
Кадмиумот најчесто бил откриен во житарките за појадок, алуминиумот во пекарските производи и слатките бисквити, оловото во лебот, живата во рибата, а акриламидот во пржениот и динстаниот компир.
Иако просечните концентрации на неколку метали се намалиле во споредба со претходните истражувања, одредени намирници – како житарките, пекарските производи и тестенините – и понатаму остануваат главни извори на изложеност преку исхраната.
„Некои намирници, особено пекарските производи и бисквитите, не само што содржат метали во траги, туку имаат и ниска нутритивна вредност“, истакна Вероник Сирo, втора координаторка на студијата.
Зеленчукот покажал нешто повисоки нивоа на одделни метали, но таа нагласила дека тоа „не ги доведува во прашање неспорните нутритивни придобивки од неговата консумација“.
Кога станува збор за кадмиумот, истражувањето покажало дека меѓу 23 и 27 проценти од децата постари од три години го надминале дозволениот дневен внес. Според Европска агенција за безбедност на храната (EFSA), кадмиумот може негативно да влијае врз функцијата на бубрезите.
Дури 76 проценти од децата биле изложени на алуминиум во нивоа што ја надминуваат токсичната референтна вредност, во споредба со 39 проценти кај возрасните. Нивото на жива во рибата во најголем дел останало непроменето во однос на претходните истражувања.
„Грабливите риби на врвот од синџирот на исхрана, како што е туната, содржат највисоки концентрации на метил-жива. Сепак, консумацијата на риба има неспорни нутритивни придобивки“, истакна Шампион. „Препорачуваме консумација на две порции риба неделно, од кои една порција масна риба, со разновиден избор на видови и извори на набавка.“
ЗАБЕЛЕЖАНИ СЕ ОДРЕДЕНИ ПОДОБРУВАЊА
Изложеноста на олово е намалена во споредба со претходните истражувања – за 27 проценти кај децата и за 49 проценти кај возрасните – што ANSES го припишува на јавно-здравствените политики, како што се забраната на оловниот бензин и користењето олово во боите и водоводните цевки.
„Иако водата и понатаму е еден од главните извори на изложеност на олово, таа не е единствената: лебот и зеленчукот исто така придонесуваат, како и алкохолните пијалаци кај возрасните“, изјави Сиро.
Нивото на акриламид е намалено и во клучни намирници како кафето, иако вкупната изложеност и понатаму останува висока.
ПОШИРОКА ЕВРОПСКА ЗАГРИЖЕНОСТ
Наодите од извештајот на ANSES ја одразуваат пошироката загриженост низ Европа. Според EFSA, тешките метали како арсенот, кадмиумот, оловото и живата се чести во храната, особено во морските плодови. EFSA предупредува дека неорганскиот арсен е особено ризичен поради неговата поврзаност со „кожни лезии, рак и развојна токсичност“, како и со „кардиоваскуларни болести, нарушен метаболизам на глукозата и дијабетес“.
Живата во грабливите риби, оловото во школките и кадмиумот во раковите и другите морски плодови и понатаму остануваат клучни причини за загриженост, особено кај бремените жени и децата, кои се најосетливи на токсичните ефекти.
