♦♦♦♦♦♦♦
Женско бебе, дијагностицирано со смртоносниот вирус COVID-19 во Кина, пред нешто повеќе од две недели, е излечено без третман, објавија кинеските здравствени власти.
Државниот весник „People’s Daily“ пишува дека бебето, девојче по име Шаошао, било пренесено на неонаталниот оддел во детската болница во Вухан само неколку часа откако се родило на 5 февруари. Кратко потоа било дијагностицирано со коронавирус.
Нејзината мајка била позитивна на болеста, сега наречена COVID-19, непосредно пред породувањето и страдала од тешка инфекција на градите.
Зенг Лингконг од неонаталниот оддел во детската болница во Вухан, вели дека „индексот на инфекција на Шаошао не бил висок, па затоа не биле употребени антибиотици во нејзиното лекување“, пренесува People’s Daily.
Бебето поминало одреден период во изолација, но не развило акутни симптоми како резултат на болеста.
„Нејзиното срце беше малку слабо, но ние го третиравме тоа“, изјави лекарот од детската болница во Вухан, д-р Зенг. „Бидејќи коронавирусот е нов, не е целосно јасно како влијае на новороденчињата. Исто така, мора да бидеме многу внимателни кога даваме антивирусни лекови на новороденчиња“, вели тој.
Шаошао е најмладиот пациент кој оздравел од коронавирусот. Бебето со чиста здравствена состојба е отпуштено од болница на возраст од 17 дена. Неговата мајка останува и понатаму во карантин.
