Сигурно е дека истиот момент кога бебето ќе дојде на свет, ќе се заљубите во неговите или нејзините очи. Сепак, знајте дека тие ќе се сменат!
Зошто се менува бојата на бебешките очи?
Бебињата кои имаат светол тен на кожата, вообичаено имаат и светли очи поради малата количина на меланин.
“Количината на меланин во ирисот (шареницата), обоениот дел од окото, ја одредува и бојата на очите кај поединецот“, истакнува Даглас Фредриг, педијатар офталмолог од Калифорнија. По раѓањето, количината на светлина стимулира создавање на меланин, поради што очите се менуваат.
Важно е да знаете дека не постојат сини, сиви, зелени пигменти во окото. Единствен што постои е кафеав, а неговата количина одредува дали лицето ќе има посветли или потемни очи.
Каква боја очи ќе има вашето бебе?
Генетиката е одговорна за количината на меланин или пигментот што ја има една личност во организмот. ДНК што бебето ја добива од родителите одредува дали тие ќе бидат сини, кафеави, зелени или некоја друга боја. Родителите со темни очи е можно да имаат дете со посветли очи, ако родителите ги носат тие гени во себе.
Практично е невозможно да се предвиди бојата на очите на детето. Дури и лекарите не можат со сигурност да кажат каква боја ќе имаат очите на детето кога ќе порасне.
Ако дете е родено со потемни очи, тоа значи дека веќе има поголема количина на меланин генетски, па бојата нема да се промени.
Кога ќе се промени бојата на очите на моето дете?
Најголемата промена во бојата на очите обично ќе ја видите во првите 6-9 месеци од животот. Може да забележите дека тие полека потемнуваат во период од неколку недели.
До дванаесеттиот месец, повеќето бебиња добиваат трајна боја на очите, иако кај некои се случува дури и до шестгодишна возраст да се појават промени (што е навистина редок случај).
