Секое дете е тврдоглаво од време на време, но психолозите објаснуваат дека одредени родителски постапки можат да придонесат за такво однесување. Одредени грешки или модели на однесување со кои се служат родителите всушност можат да ги направат децата уште потврдоглави и со тоа да доведат до одредени проблеми со однесувањето или контролирањето на емоциите.
Една од овие грешки се однесува на донесувањето одлуки. Психолозите тврдат дека многу родители одбиваат да ја делат контролата, ретко се подготвени да признаат кога грешат, главно секогаш се тие во право и како такви не им даваат можност на своите деца да почувствуваат дека тие одлучуваат за некои работи.
На пример, ако детето сака да носи чевли во градинка или училиште кои можеби не му стојат најдобро со облеката што ја носи, психолозите ги советуваат родителите дека сепак треба да му го дозволат тоа. Како што велат, донесувањето на навидум неважни одлуки може да го направи детето посигурно и посамоуверено.
Уште една грешка што ја прават многу родители, и тоа честопати несвесно, се однесува на недостатокот на емпатија. За некои одлуки не може да се преговара, но постои начин родителите да донесат авторитативни одлуки без да бидат бесчувствителни. Како што објаснуваат психолозите, потврдувањето на чувствата на детето му дава до знаење дека сè што чувствува е важно и валидно. Според нивното мислење, родителите треба да покажат емпатија и да се обидат да ја развијат истата и кај своите деца.
