Секое бебе е различно. Некои бебиња ќе се одвикнат од ноќното хранење на четири месеци, а некои на две години. Одвикнувањето зависи од родителите, исто колку и од детето, затоа ако сте уморни од тоа да се будите еднаш или повеќе пати навечер за да го нахраните детето, може да размислите за некои работи пред да почнете да го одвикнувате детето од ноќно хранење.
Познато е дека лекарите препорачуваат минимално осум часа сон, но тоа едноставно не е остварливо за сите родители. Наместо да ги користите осумте часа како мерило, променете ги очекувањата на пет или шест часа, за да не се почувствувате дека сте потфрлиле во улогата на родител.
Недоволната количина на сон е исцрпувачка за сите родители. Некои денови ќе се чувствувате полетно и полни со адреналин и ќе можете да издржите со малку проспиени часови, а некои денови ќе се чувствувате како со себе да влечете вреќа тешка 10 килограми.
Постпородилната депресија и анксиозност може да се влошат со недостатокот на сон и да ја оневозможат мајката да излезе на крај со неспиењето. Обидете се да ги препознаете сигналите кои ви ги испраќа телото и побарајте помош ако не можете да го совладате недостатокот на сон.
ЗОШТО БЕБЕТО СЕ БУДИ НАВЕЧЕР?
Земете ги предвид подлабоките причини поради кои детето се буди навечер:
• Ментални и емоционални: На малите деца им треба време за да ги “обработат“ своите денови, особено ако имале ново или возбудливо искуство.
Ако тоа не го направиле пред да легнат да спијат, ова може да биде една од причините зошто се будат навечер. Совет е да му дадете поголемо значење на периодот на подготовка за легнување во кревет и облекување пижами, како и миење заби. Тоа им помага на децата да ги процесуираат и разберат искуствата и им помага да спијат мирно ии безгрижно.
• Физички: На децата им се потребни многу можности за трчање, движење и максимално користење на нивните тела.
Ако детето минува долго време седејќи, можно е ноќта да ја поминете повеќе будни, отколку заспани. Имајте на ум дека во деновите кога не може да излегува надвор, да му овозможите да ја потроши својата енергија, пред да си легне да спие.
- Прехранбени: Дали детето изело поголема количина преработена храна, храна полна со бои, адитиви или конзерванси? Или можеби млечни производи или оние со пченица?
Ако детето јаде непосредно пред одење во кревет, размислете и за вашата исхрана. Дали сте се напиле шолја кафе подоцна и после тоа сте го доеле? Водењето дневник на исхрана и сон на детето ќе ви помогне да препознаете одредени обрасци кои ја поврзуваат нивната исхрана со спиењето. Ако детето се буди навечер и испупта гасови, размислете што сте јаделе во текот на денот и може да добиете одговор на прашањето за честото будење во текот на ноќта.
Дали млекото е она што му треба на детето?
Некои деца искрено се будат поради храна, а некои се будат од други причини и се повеќе од среќни што можете да ги надоите или да им дадете шишенце за да се смират.
Ова се некои совети кога е време за одвикнување на детето од ноќно хранење:
Ако хранењето трае подолго од пет минути, тогаш детето навистина сака млеко. Дали му е потребно или не млеко, тоа е друго прашање. Во тој случај, одвикнувајте го постепоено, во период од една недела и повеќе и наместо млеко, прво понудете му вода за да се обидете да го задоволите.
Ако хранењето трае помалку од пет минути, веднаш заменете го со тешење, лулање, нишкање или тапкање и постепено намалувајте го тој период откако ќе поминат седум до 10 ноќи.
Уште еден знак дека детето е подготвено на одвикнување од хранење во текот на ноќтае кога се буди во различно време. На пример, околу 23 часот и 03 часот една вечер, а друга ноќ околу 01 часот и 04 часот наутро.
