Хелена Ли, медицинска сестра од Англија, на Фејсбук опишала како го решила проблемот со давање лекови на бебето и на тој начин на многу родители им понудила решение за вакви ситуации кои можат да станат многу стресни.
Секој пат кога се обидувала да му даде лек на своето болно бебе, барем половина завршувал врз бебето или на подот. За да го реши проблемот, таа прибегнала кон трик што го открила на интернет и се уверила дека функционира.
Имено, го ставила шприцот за давање на лекот во силиконската цуцла/капаче од шишето и без проблем му го дала лекот на бебето. Бебето инстинктивно посегнало по „шишето“ и не ни „сфатило“ дека пие лек.
„Ниту една капка не се истури“, напишала таа.
Мајките, воодушевени од едноставноста на овој трик, ја споделиле нејзината објава во огромен број и оставиле многу коментари. Некои мајки во коментарите ги напишале и своите трикови што ги користат за полесно да им даваат лекови на бебињата.
Сепак, пред некој да одлучи да го испроба овој трик, треба да запомни дека на децата помлади од две години не треба да им се даваат никакви лекови без консултација со педијатар. Исто така, кога го даваат лекот, родителите треба строго да се придржуваат до одредените дози и никогаш да не користат класични кафени лажички или супени лажици за дозирање.
