Високите температури, а особено топлотниот бран со кој се соочуваме во моментов, наметнуваат постојано користење на клима-уреди. Иако климатизацијата нуди олеснување во најжешките денови, особено кога се во прашање децата, таа не е секогаш безбедна. Наглите температурни разлики меѓу жешкиот надворешен воздух и ладните затворени простории можат да предизвикаат различни здравствени проблеми кај најмладите.
Клима-уредот може да биде добар сојузник во борбата со летните горештини, но ако не се користи внимателно, може да стане тивок непријател на детското здравје. Умереност, правилна употреба и следење на реакциите на детето се клучни за лето без настинки, воспаленија и непотребен стрес
Зошто се ризични климатизираните простории за децата?
Децата се поосетливи на промени во температурата затоа што нивниот организам побавно се приспособува на наглите услови во околината. Кога доаѓаат од жешка средина и веднаш влегуваат во просторија со многу пониска температура, организмот доживува термален шок, што може да го ослаби имунитетот и да предизвика:
- чести настинки;
- болки во грлото;
- кашлица;
- главоболки;
- замор и раздразливост;
- погорем ризик од воспаленија на уши и синуси.
Кога клима-уредот работи, тој не само што го лади воздухот, туку и го суши, односно ја намалува влажноста во просторијата. За децата, особено малите, сувиот воздух може да биде проблематичен бидејќи:
- Очите стануваат суви и подложни на иритација – може да се појави чешање, црвенило или чувство на „песок“ во очите.
- Носната слузница се суши, а таа е природната прва одбрана од вируси и бактерии. Кога е сува, детето полесно се разболува.
- Дишните патишта стануваат почувствителни – кај некои деца тоа може да предизвика кашлица, отежнато дишење или дури да ги влоши алергиите и астмата.
Дополнителен ризик постои ако клима-уредот не е редовно чистен и филтриран – тогаш, покрај сув воздух, во просторот се шират прашина, мувла, бактерии и други алергени, кои можат да предизвикаат воспаленија и инфекции.
Како да се користи клима-уредот правилно?
Иако не можеме целосно да ја избегнеме употребата на клима-уредот, особено кога температурите се над 35°C, можеме да ја користиме на здрав и одговорен начин. Еве неколку практични совети:
- Одржувајте умерена температура
Како што препорачува Американската академија за педијатрија, температурата во детските простории треба да се одржува меѓу 24 и 26 степени Целзиусови.
- Никогаш не насочувајте да дува директно кон детето
Клима-уредот не смее да дува директно кон кревет, трпезариска маса или место за игра. Насочете го дувањето кон таванот или ѕидот за непосредно и рамномерно ладење.
- Не претерувајте со ладењето ноќе
Телото ноќе е посензитивно – оставете температура од 26-27 °C и користете тајмер за климата да се изгаси по 2-3 часа.
- Често проветрувајте
На неколку часа направете кратко проветрување за да се освежи воздухот и да се намали сувоста во просторијата.
- Редовно чистете го клима-уредот
Бактерии, мувла и прашина лесно се наталожуваат во филтрите. Нередовното одржување може да доведе до алергии и респираторни инфекции. Препорачливо е чистење на филтрите на секои 2-3 недели.
Како да го подготвите детето за температурни разлики?
Облечете го соодветно: ако е во климатизирана просторија, нека носи тенка маица со долги ракави или блузичка.
Не дозволувајте премин од голема жештина на ладно без премин – останете неколку минути во сенка пред да влезете во затворен простор. После излегување од ладна просторија, избегнувајте веднаш изложување на пладневно сонце – почекајте во сенка.
Дали постојат алтернативи?
Освен климата, постојат поприродни и побезбедни начини за разладување:
- Затворајте ги прозорците и ролетните во текот на денот за да не влегува топлина.
- Отворете ги во вечерните и раните утрински часови кога воздухот е посвеж.
- Користете вентилатори, но не ги насочувајте директно кон детето.
- Ставете влажна крпа или чинија со вода во просторијата за да ја зголемите влажноста на воздухот.
Клима-уредот може да биде добар сојузник во борбата со летните горештини, но ако не се користи внимателно, може да стане тивок непријател на детското здравје. Умереност, правилна употреба и следење на реакциите на детето се клучни за лето без настинки, воспаленија и непотребен стрес.
