Ви се случило ли детето одеднаш да појави осип и интензивно да се чеша по кожата? Или пак го мачат грчеви, дијареа, а дури може да почне и да кашла и отежнато да дише? Сите овие знаци или симптоми може да значат дека настанала алергиска реакција на одреден вид на храна. Но, овој тип на алергија, за среќа, најчесто се повлекува како детето расте.
Вообичаено е одредена алергиска реакција да е веќе присутна кај член од потесното семејство. Доколку мајката има алергиска реакција на храна, многу е веројатно дека и детето ќе развие алергија, но алергиската рекација не мора да биде на ист вид на храна.
ЗОШТО СЕ ПОЈАВУВА АЛЕРГИЈА
Алергијата е реакција на имунитетот на состојка од околината или од храна, која организмот ја препознава како штетна и лоша. Најчесто таа состојка е белковина која се нарекува алерген. Организмот, алергенот од намирниците го препознава како штетен и започнува битка со антителата IgE за да го отстрани алергенот. Еднаш кога организмот ќе го препознае алергенот како штетен, тој го запомнува и при секој следен влез на алергенот во организмот, доаѓа до нова битка помеѓу антителата IgE и алергенот, па доаѓа до појава на симптоми на алергија.
Детето со алергенот прв пат се среќава во мајчината утроба или во текот на доењето. Уште тогаш детето може да развие пречувствителност на некоја намирница, т.е. уште тогаш почнува да создава антитела. Тоа се нарекува сензибилизација. Најчесто алергиските реакции кај децата се поврзани со консумирање на јајца, кравјо млеко, соја, кикирики, како и риба и школки.
ШТО ДА НАПРАВИТЕ?
Најдобра диетотерапија кај алергиската реакција е елиминациската диета. Доколку постои одредена храна која на вашето дете му предизвикува прблеми, најдобро е таа храна привремено да се исфрли од исхраната. Клучно е при такви диети да се посоветувате со стручно лице, за да се избегне прехранбен дефицит. На детето му е исклучително важна правилната исхрана која ќе му ги обезбеди сите потребни хранливи материи и енергија за правилен раст и развој.
Често децата кои имаат алергиска реакција на сурови намирници не реагираат на таа намирница ако претходно е сварена или печена. На пример ако вашето дете е алергично на сурова, свежа јаболка, не мора да значи дека ќе биде алергични на колач од јаболки или компот. Многу често со варење или печење, намирницте може да го намалат или уништат алергенот во храната и на тој начин ја прават намирницата безбедна за детето.
