Денешните деца, и покрај сите играчки и забавни содржини, се досадуваат повеќе од било кога. Ништо не им го задржува вниманието подолго од пет минути, па родителите постојано се трудат да ги забавуваат и да им го осмислат слободното време, што е апсолутно погрешно. Суштината, велат детските психолози е да ги научите да ја трпат досадата, бидејќи во спротивно од вас и од останатите во нивното опкружување постојано ќе бараат да ги анимирате. Тие нема да се потрудат, нагласуваат лекарите, сами на себе да си ја осмислат содржината која ќе ги исполни, па во животот тешко ќе се снаоѓаат.
Преку досадата, доплнуваат психолозите, децата се запознаваат себе си, воочувајќи што ги интересираи што им го задржува вниманието па на основа на тоа можат сами да си ги креираат своите активности. Од родителите не се очекува друго освен да им обезбедат стимулативно опкружување.
Ако децата ги препуштиме сами на себе, да сами си го осмислат слободното време, нема да знаат што да прават. Од друга страна, ако им наметнеме наш план и лек против досада, ќе мислат дека им го одземаме слободниот избор, па нема да не слушаат. Затоа треба да се најде средина, подвлекуваат детските психолози.
За децата е најдобро да бидат во движење, да бидат во природа и да бидат во друштво на свои врсници, но нашата реалност е малку поинаква. Она слободно време кое го имаат го поминуваат во виртуелен свет, зад компјутер или со телефон и таблет во рацете. Со оглед на тоа дека овој тренд е од генерациска природа, проблемот не е нималку лесен да се реши, посебно ако се има предвид дека видео игрите и компјутерот може лошо да влијаат на развојот на детето. Затоа на децата задолжително ограничете им го времето на пристап до модерната технологија оти тоа е за нивно добро. Не возбудувајте се ако ви се налутат за тоа, работа на родителите и е да поставуваат граници и правила на однесување, заклучуваат психолозите.
