Медицинска сестра од Мелбурн, Кејт Вејд, која работи како едукатор открила “тајни знаци“, односно говор на телото со кои бебињата порачуваат дека се гладни, односно сити, а кога би сакале да играат.
Истакнувајќи дека сите бебиња се различни, таа тврди дека повеќето бебиња ги користат овие знаци.
“Студиите покажале дека кога новороденчето е гладно, тоа своите шаки ќе ги стисне во тупаница. Како хранењето напредува, нивните рачиња полека се опуштаат и се отвораат. Тоа значи дека им е доволно храна и дека се сити“, тврди таа.
Иако повеќето родители сметаат дека бебешкиот плач е единствениот начин на кој тоа комуницира за своите потреби, Вејд ги поттикнува родителите од првиот ден да го набљудуваат однесувањето на своите бебиња. Така некои бебиња ќе покажат дека се гладни со нагло будење или така што ќе мавтаат со рацете и со нозете.
“Отворањето уста и вртењето на главата од една на друга страна, како да бара дојка, исто така е индикатор дека бебето е гладно“.
И додека стискањето на дланката во тупаница е еден од показателите дека бебето е гладно, Вејд предлага родителите да обрнат внимание на звукот кој бебето го произведува додека го “влече“ млекото – кога ќе престане звукот, тоа значи дека е сито.
Откако ќе заврши со хранење, бебето може да биде расположено за игра и тоа ќе го покаже така што ќе има поопуштени движења и ќе ги пружа рачињата кон родителите. Знак дека сака да игра ќе покаже и со одржување на контакт со очите со родителите и нежни движења.
Јазикот на телото со кој порачува дека му се спие, веројатно на сите е познат – завеањето е показател дека бебето и уморно и поспано. Исто така, губењето на интерес за игра или други активности може да бидат знак дека на ред е спиење. Според Вејд, и муртењето и извртување на грбот наназад се некои од можните знаци дека на бебето му се спие.
