Експертите, родителите и наставниците се повеќе се загрижени за негативното влијание што социјалните мрежи го имаат врз децата и младите. Менталното здравје на младите е сè позагрозено, а експертите веруваат дека тоа има многу врска со социјалните мрежи.
„Гледаме многу ментални болести кои произлегуваат од прекумерната употреба на социјалните мрежи, онлајн насилство и зависноста од екранот“, изјави детскиот психијатар д-р Емили Семер. „Децата исчезнуваат во онлај световите, не можат да спијат, имаат проблеми со вниманието, импулсивни се, емоционално нерегулирани и агресивни.
Сето ова се некои од причините зошто на современите деца им е потребна дигитална детоксикација.
Извештаите покажуваат дека само три отсто од 12-годишниците во Велика Британија немаат свои телефони, но експертите секако мислат дека дел од решението не треба да биде само одземање на екраните на децата, туку и нивно ангажирање во други активности, пред се на отворено.
„Времето поминато на отворено го намалува стресот, го подобрува расположението и помага да се изгради отпорност“, вели детскиот психолог д-р Кимберли Бенет. „Истражувањата покажаа дека само 20 минути поминати надвор, во природа, можат да ги направат децата значително посреќни. Качувањето на дрво, на пример, ги учи да решаваат проблеми, да бидат упорни и да го проценат ризикот, што е многу поважно од брзите награди што ги добиваат преку игрите.
Секако, дополнителен плус е тоа што децата на овој начин се физички поактивни, а експертите предупредуваат дека повеќето деца не ги исполнуваат препораките за минимална количина на дневна физичка активност. Физичката активност, посочуваат, е исто толку важна за развојот на мозокот колку што е важна за развојот на телото.
Играњето надвор, исто така, им помага на децата да стекнат некои важни вештини, како што се тимска работа и независност – вештини кои претходните генерации имаа многу повеќе можности да ги практикуваат.
Експертите нагласуваат дека дигиталната детоксикација е важна за сите, особено за децата во развој, кои поминуваат време подалеку од екраните и социјалните мрежи за да бидат тоа што се, да се фокусираат на поврзување и комуникација лично, што е клучно за да прераснат во комуникативни луѓе.
„Општествено, играњето надвор им помага да преговараат, да соработуваат и да научат за вистински пријателства. Кога има несогласување, тие мора да го решат, за разлика од ситуациите на игра каде што, кога ќе дојде до расправија, таа обично завршува со тоа што некој едноставно ја напушта играта. Премногу време на екранот, од друга страна, е поврзано со раздразливост, слаб сон и пократко внимание на детето, вели психологот.
Таа потсетува дека децата ги имитираат возрасните и дека ако ние, возрасните, цел ден сме залепени за телефоните наместо да поминуваме време надвор, тогаш и децата ќе сакаат екрани.
„Не се работи за забрана на екраните, туку за тоа да реалниот живот им стане забавен. Нека престојот на отворено стане навика, дел од вашите секојдневни ритуали – прошетајте пред или по работа, возете велосипед до училиште…“
Обидете се со неколку различни активности на отворено и видете во што најмногу ужива вашето дете – некои можеби сакаат да одат на игралиште, други да возат велосипед, други да садат растенија… Дајте им можност да најдат нешто што го сакаат и ќе сакаат да го прават, а што е исто така добро за нивното ментално и физичко здравје.
