Секој од нас тежнее кон тоа да биде што подобар родител. И секој од нас знае дека ова често не е толку лесно да се постигне. Родителството е полно со предизвици и понекогаш со најдобри намери правиме нешто погрешно. Бидејќи секое дете е различно, не постои прирачник според чии насоки сите ќе ги следиме во воспитувањето, но постојат овие универзални правила, чија примена обезбедува дека детето ќе порасне во среќна, задоволна и, пред се, здрава личност.
- Никогаш не удирајте дете!
Секој родител знае дека неговото дете може да го излуди и да го доведе во ситуација да посака да го плесне по задникот, но не си дозволувајте тоа навистина да го направите. Тргнете се од детето, измијте се со ладна вода, врескајте во перница… Обидете се да ја ослободите насобраната негативна енергија на друг начин што не го загрозува вашето дете. Зошто да не се удри? Има многу причини. Удирајќи го детето, испраќате пораки кои веројатно никогаш не би сакале да му ги всадите – дека е во ред да удирате некој послаб од вас, дека е во ред да ја удирате личноста што ја сакате, дека е во ред да удирате кога не знаете мирен излез од ситуацијата, дека е во ред да употребувате физичка сила, да се „слушаат“ родителите поради страв… Вашиот авторитет над детето, кој е непобитно потребен, нека почива на љубов, а не на страв.
- Почитувајте го детето!
Вашето дете, без разлика колку е мало, има своја личност, интереси и желби. Иако е мало, тоа е и човечко суштество кое бара однос полн со љубов и почит. Тоа не значи дека треба да му го исполните секое барање, но треба да му дозволите слободно да ги изразува своите желби, иако некои од нив може да бидат одбиени. Не се потсмевајте со него, не минимизирајте ги неговите стравови или сомнежи, никогаш не го навредувајте или омаловажувајте. Никогаш не го губете од вид фактот дека ова мало суштество има свој интегритет што ниту вие, ниту некој друг не смеете да го нарушите.
- Играјте со детето
На вашето дете му треба време што го поминувате играјќи. Не мора да играте со часови, експертите тврдат дека е доволно и половина час дневно, но тоа мора да биде време во кое нема да ве прекине ѕвонењето на мобилниот телефон и во кое нема паралелено да готвите ручек. Најдобар е методот „floortime“ – спуштете се на под со детето, играјте со фигури, цртајте, правете пат и возете автомобили, гаѓајте се со перници, скокоткајте се, вежбајте, пејте, танцувајте, моделирајте… Следете го детето и неговите желби и бидете сигурни дека таквата целосно посветена игра ќе му ги наполни батериите.
- Комуницирајте
Покажете искрен интерес за она што го прави детето, разговарајте за неговите мисли, чувства и секојдневие. Разговарајте со него за тоа што сте правеле, што ви се допаѓа, а што не… Го учите малото дете да ги вербализира своите чувства за да може кога ќе порасне точно да ги открие своите чувства и да научи да се справува со нив на правилен начин. Дозволете му само да ги пренесе своите желби и обидете се да му давате избор што е можно почесто. Објаснувајте сè и разговарајте уште од најрана возраст – секако, штом детето ќе почне да зборува, не заборавајте и да го слушате.
- Бидете искрени со детето
Повеќето деца речиси инстинктивно чувствуваат кога нивните родители ги „муваат“. Избегнувајте таков однос и бидете искрени со детето од самиот почеток. Секогаш кажувајте му ја вистината за важни настани, промени и слично, колку и да се незгодни прашањата, бидејќи детето инстинктивно чувствува кога нешто криете од него, но не знае да разбере и протолкува што се случило. Одговорност на родителот е да му ја каже вистината на детето на начин што е прифатлив и разбирлив за него, со факти и без претерување со деталите и онолку колку што може да прифати за неговата возраст.
