Слатките, печивата и засладените грицки на многумина го обележалр детството, но сè повеќе експерти предупредуваат дека оваа навика воопшто не е безопасна. Прекумерниот внес на шеќер во детството може да има долгорочни последици по физичкото и менталното здравје, а најопасен е токму затоа што делува тивко и незабележливо.
Светската здравствена организација (СЗО) препорачува процентот на додадени шеќери да не надминува 10% од вкупниот дневен внес на калории, идеално под 5%. Но, реалноста често е сосема поинаква. Многу деца веќе во текот на појадокот консумираат значително повеќе од препорачаното.
На пример, појадокот што се состои од засладен јогурт, индустриски житарки и чаша овошен сок може да содржи повеќе од 25 грама шеќер, што е пет лажички. Детскиот организам нема потреба од таква количина, а родителите честопати не се свесни колку шеќер всушност се наоѓа во секојдневните намирници.
Што премногу шеќер му прави на детскиот организам?
Нутриционистите истакнуваат дека проблемот не е само во калориите. Телото на детето сè уште се развива и е исклучително чувствително на промени во исхраната. Кога детето често консумира засладени производи, телото се навикнува на брзи скокови и падови на шеќерот во крвта. Ова може да предизвика зависност од шеќер, нестабилни нивоа на енергија, раздразливост и да создаде основа за инсулинска резистенција, што е ран чекор кон дијабетес тип 2.
Покрај тоа, премногу шеќер може негативно да влијае на концентрацијата, квалитетот на спиењето, однесувањето и училишниот успех. Експертите исто така предупредуваат дека стабилните нивоа на гликоза во крвта се важни за здрав развој на мозокот и когнитивната функција кај децата.
Доколку прехранбените навики не се корегираат на време, децата со прекумерна тежина се изложени на поголем ризик од развој на хронични болести во зрелоста, вклучувајќи дијабетес, кардиоваскуларни заболувања, висок крвен притисок и депресија.
Што можат да направат родителите?
Важно е да бидат свесни што се смета за додаден шеќер, бидејќи не станува збор само за слатки. Шеќерот е скриен и во „здравите“ житарки, овошните јогурти, соковите од продавница и готовите оброци. Еве неколку едноставни совети од експерти:
- Читајте ги декларациите и изберете производи со помалку додаден шеќер.
- Дајте предност на свежо овошје наместо слатки и засладени пијалоци.
- Ограничете ги слатките на посебни пригоди наместо за секојдневна консумација.
- Разговарајте со децата за важноста на здравата исхрана на начин што е соодветен за нив.
- Бидете пример, децата најмногу учат гледајќи ги своите родители.
