Освен класичните изливи на бес или тантруми, секој пат кога не го добива она што го сака, разгалено дете можеме да препознаеме по некои други, малку посуптилни знаци. Имено, психолозите уверуваат дека повеќето разгалени деца прават одредени работи кои ги разликуваат од останатите врсници. Еве за кои знаци станува збор.
Секогаш е непослушно
Иако понекогаш е сосема нормално детето да не сака да ги послуша родителите или некој друг авторитет, ако таквото однесување се повторува постојано, тоа може да биде знак за разгалено дете. Имено, секое дете мора да научи да ги почитува и слуша родителите, воспитувачите или наставниците, а не постојано да одбива да соработува.
Се обидува да не контролира
Како што објаснуваат психолозите, разгаленото дете е подготвено во повеќето случаи да го крене гласот и да бара исполнување на неговите желби. Но, таквото однесување е непожелно затоа што детето никогаш не треба да му вика на родителот или да употреби друга сила за да воспостави контрола.
Склоно е кон агресивно однесување
Освен што ќе вика, разгаленото дете ќе биде склоно и кон агресивно однесување. Како што објаснуваат психолозите, дете кое не ги почитува границите и не знае за ограничувања, ќе има тенденција да удри или повреди родител, воспитувач или друго дете за да го добие она што го сака.
Никогаш не сака да споделува
Иако бројни студии покажуваат дека никогаш не треба да го присилуваме детето да ги дели своите играчки или работи со други деца, ако никогаш не сака, тоа може да укаже дека е разгалено. Психолозите објаснуваат дека разгаленото дете е научено секогаш да добива се што ќе посака, а бидејќи за него нема правила, нема да биде подготвено да ги сподели своите работи.
