Поголемиот дел од родителите сакаат да помогнат во зајакнувањето и развивањето на самодовербата на своите деца. Позитивните повратни информации и пофалбите можат да ја зголемат нивната самодоверба и да ги поттикнат да истражуваат нови можности. Меѓутоа, детскиот психолог и едукатор за родители Џејми Блох тврди дека понекогаш не е доволна само пофалбата.
„Сржта на самопочитувањето доаѓа од чувството дека сте сакани и безбедни и од развојот на компетентност во сопствените вештини и реалнот искуство од тој развој“, истакнува таа.
Таа споделува пет воспитни методи кои можат да го поддржат развојот на самодовербата кај децата.
- Дајте им простор на децата да вежбаат и експериментираат со нови вештини
Психологот тврди дека на децата треба да им дозволиме независност. Таа советува да им обезбедиме на децата простор соодветен за нивната возраст за да можат самостојно да ги прават работите.
- Слушајте ги
„Ако одвојувате десет минути дневно за да им го дадете на вашите деца вашето неподелено внимание при слушањето, ќе им покажете дека се грижите“, вели Блох. Тврди дека децата кои се чувствуваат ценети, видени, слушнати и сфатени полесно развиваат самодоверба и љубов кон себе.
- Играјте си со нив
Психологот советува „да се спуштиме на нивото на нашите деца и да зачекориме во нивниот свет“. Клучот е да им го посветите вашето внимание и да се забавувате со нив, бидејќи тоа поттикнува љубов и поврзаност.
- Дозволете им да прават грешки без осудување
Грешките се дел од животот, па затоа е важно да им дозволите на децата да прават грешки. „Понудете им емотивна поддршка, дајте им простор да се обидат да го решат тоа. Покажете им како да ја надминат грешката и да одат напред, но не правете го тоа наместо нив“, советува Блох. Ова им помага на децата да развијат решителност и упорност.
- Дајте им можности да донесуваат одлуки
Дозволувањето на децата сами да изберат облека или сами да донесуваат други одлуки помага да се поттикне решителност, мислење и разбирање на сопствените граници и потреби.
„Дете кое знае што сака е дете кое е сигурно во своите одлуки и избори“, потенцира психологот. Таа објаснува дека неуспехот е дел од развојот на самодоверба.
„Сакаме нашите деца да почувствуваат и знаат дека можат да прават грешки, да доживеат неуспеси и дека овие моменти не ја дефинираат нивната вредност. Важно е да разберат дека таквите моменти се дел од развојот на нивните вештини. Не можеме да им помогнеме да изградат самодоверба доколку не им дозволиме да истражуваат, искусуваат и активно учествуваат во светот околу нив“, заклучува Блох.
