Периодот на бременост за секоја жена е време на големи промени, физички и психолошки. Повеќето бремености напредуваат без никакви проблеми и повеќето трудници, и кога мислат дека нешто не е во ред, всушност „дуваат на ладно“. Сепак, постојат некои симптоми кои укажуваат на посериозни компликации кои не треба да ги игнорирате. Ако чувствувате дека нешто навистина не е во ред со вашето тело, побарајте лекарска помош. Дури и на крајот се покаже дека сте згрешиле, ниту еден лекар нема да ве обвини што сте го контактирале, а вие ќе бидете помирни. Ви претставуваме симптоми кои може да упатуваат на посериозни компликации.
- Интензивна болка во стомакот
Ако сте бремени помалку од 12 недели и чувствувате остра болка во долниот дел на стомакот (на едната или двете страни на матката), може да се работи за ектопична (вонматерична) бременост. Болките во рамената и околу ректумот укажуваат вонматерична бременост, затоа задолжително итно јавете се на лекар. Острата болка може да упатува и на спонтан абортус, абрупција на плацентата или предвремено породување. Болката во горниот дел на стомакот околу црниот дроб (на десната страна, под градниот кош) може да биде симптом на прееклампсија – нарушување кое погодува 5 до 8 проценти од трудниците. Најчесто се јавува после 20-та недела од бременоста, а симптомите се висок крвен притисок и протеини во урината.
- Болка во градите
Тоа може да укажува на белодробна емболија (згрутчување на крвта во белите дробови) или воспаление белодробната обвивка (плевритис) и не смее да се игнорира.
- Треска и температура
Доколку имате температура од 37,8 степени Целзиусови, а немате други симптоми, веднаш обратете се кај вашиот лекар. Исто така, ако температурата надмине 38,9 степени, побарајте лекарска помош бидејќи може да имате инфекција која бара антибиотски третман.
- Прекумерно отекување на долниот дел од нозете и прекумерно дебелеење
Овие симптоми може да укажуваат на прееклампсија.
- Интензивно повраќање и/или дијареа
Иако утринската мачнина е непријатна, таа не е опасна. Меѓутоа, ако постојано повраќате и не можете да задржите ништо, може да дехидрирате. Исто така, ако имате дијареа, течностите во телото се намалуваат, што може да биде опасно за вас и вашето бебе. Ако повраќањето е придружено со висока температура, можеби ќе треба да одите во болница за да примите инфузија.
- Главоболка, двојна слика или „севање“ пред очите
Ако имате главоболка во првиот триместар или редовно страдате мигрена, веројатно не се работи за нешто сериозно. Но, ако имате ненадејни главоболки, двојно гледање или светки пред очите во вториот и третиот триместар, тоа може да биде знак за прееклампсија и опасно висок крвен притисок, што бара болничко лекување.
