Бројот на случаи на морбили (мали сипаници) во светот годинава е намален, но напорите во борбата против пандемијата со коронавирусот ја пореметија кампањата за вакцинација и превенција, предупреди вчера Светската здравствена организација (СЗО).
“Во ноември, над 94 милиони лица ризикуваат дека нема да бидат вакцинирани како што е предивидено, поради прекинот на кампањата за борба против мали сипаници во 26 земји“, забележува СЗО и Агенцијата за спречување и превенција на болести на САД.
“Меѓу земјите кои ги одложија кампањите предвидени за 2020. само осум (Бразил, Етиопија, Непал, Нигерија, Филипни, Централноафриканска Република, ДР Конго и Сомалија) ги обновија кампањите по првичното одложување“, се вели во документот.
“Пред кризата со коронавирусот, светот беше соочен со криза со мали сипаници, кои не исчезнаа“, вели Хенриета Фор, директорка на УНИЦЕФ.
Морбилите минатата година во светот предизвикаа смртен исход кај 207.500 лица, што е за 50 проценти повеќе отколку во 2016. Исто така, лани се забележани 870.000 случаи во светот.
Малите сипаници се исклучително заразна болест, повеќе од КОВИД-19, ебола, туберкулоза или грип. Тие напредуваат во сите регии во светот, а големи епидемии се пријавени во Конго, на Мадагаскар, Украина и во Бразил.
За директорот на СЗО, Тедрос Аданом Гебрејесус, “тие податоци јасно покажуваат дека не успеваме да ги заштитиме децата од морбили во сите региони во светот“.
