Американскиот педијатар од Харвард, Кели Фрадин, советува како да се грижиме за болно дете дома. За секој родител е исклучително тешко да го гледа своето дете беспомошно и безволно, а се јавува мешавина од емоции: страв, љубов, збунетост, загриженост и тага.
Кога вашето дете е болно, последното нешто што ви треба е да биде преплавено со противречни информации или несакани совети. Сакате само да им биде подобро, вели таа.
И самата мајка на две деца споделува пет работи кои никогаш не ги прави кога нејзините деца се болни:
Сонот е важен
Ако имаат температура, но спијат, никогаш не ги будете за да го земат лекот.
„Сонот е важен за заздравување, закрепнување и раст, а децата и онака тешко заспиваат кога ги мачи кашлица или затнат нос. Иако можеби сте загрижени за температурата, ако детето се чувствува удобно и се одмара, тоа не е итен случај што бара лекови истиот момент. Дозволувајќи им да се одморат, можно е нивниот имун систем да биде подобро опремен да ја врши својата работа и да помогне во борбата против вирусот“, вели Кели.
Таа советува и дека не треба да избегнувате лекови за намалување на температурата. Таа самата, посочува, никогаш не се двоуми да им даде на децата ибупрофен или парацетамол.
Ако детето има температура и дише побрзо или потешко, пие помалку течност, дајте му лек. Сепак, ако забележите дека ги давате овие лекови три или четири пати на ден повеќе од три дена, веројатно е време да посетите лекар, напоменува докторката.
Не се потпирајте само на термометарот
Термометрите не се најпрецизни инструменти, тврди Фрадин.
„Сум примила многу панични телефонски повици од родители кои гледаат висока бројка, но погледнете го вашето дете пред да ве фати паника. Ако дише нормално и добро е хидрирано, веројатно не е итен случај. Меѓутоа, ако изгледаат многу болни и вашиот термометар вели дека нема температура, можеби сепак ќе им треба лекарска помош“, наведува таа.
Внимателно со дозирањето со лекови
Речиси 700.000 деца се соочуваат со грешки во лекувањето секоја година. Малите деца се изложени на најголем ризик бидејќи често имаат повеќе старатели кои можеби нема да проверат кој што и кога им дал.
„Заради бебзедност, секогаш давам информации за дозирање во милилитри за да ја подобрам точноста и да спречам грешки“, објаснува Кели.
Таа сама избегнува непотребни лекови, па на своите деца им дава само мед за да им ја смири кашлицата. Истакнува дека лековите против кашлица како кодеин или декстрометорфан можат да направат повеќе штета отколку корист и не се препорачани од Американската академија за педијатрија.
„За деца постари од една година користам само мед или сируп против кашлица со мед како главна состојка. Се покажа дека работи исто толку добро, но со помал ризик“, посочува таа.
