Децата се деца, а на децата им се случуваат незгоди. И тоа секогаш ќе биде така. Но, сепак, одредени активности носат поголем ризик од другите. Понекогаш ги предупредуваме и не успеваме да ги спречиме, понекогаш ќе ни се налутат што се обидуваме да спречиме нешто што им изгледа безопасно, а понекогаш дури и ќе престанат да го прават она за што ги предупредуваме. Иако нема да успееме секој пат, можеби некои повреди сепак може да спречиме…
А кој подобро го знае „прегледот“ на сите можни повреди и нивните причини, ако не – педијатар, и тоа посебно оној кој е специјализиран за итна медицина. Ургентен е местото каде што, за жал, завршуваме со децата по некои од епизодите во кои не сме успеале да спречиме несреќа и повреда. Токму затоа споделуваме совети на педијатри од итна медицина на кои им беше поставено прашањето – што никогаш не би дозволиле на своите деца бидејќи ризикот од повреда е преголем.
Возење на предно седиште пред 13 години
Според американскиот Центар за контрола и превенција на болести, сообраќајните несреќи со моторни возила се водечка причина за ненамерни повреди и смрт. Децата секогаш треба да бидат на задното седиште, правилно и соодветно врзани. Ова подразбира соодветно седиште или подоцна бустер седиште и појас, погодни за возраста, висината и тежината на детето.
Скокање на поголеми трамболини
Според лекарите, најголем ризик претставуваат јавните трамболини и трамболина парковите. Неконтролираната средина и големиот број деца го зголемуваат ризикот од судири и падови, па скршениците и ортопедските повреди се многу почести во таква средина. Во зависност од тежината на детето, скокот може да биде доста силен, а ако се случи друго дете да се најде во близина, ситуацијата е непредвидлива. Други повреди настанати во трамболина вклучуваат расеченици, потреси и повреди на ‘рбетот.
Пливање без надзор
Давењето е уште една водечка причина за ненамерни повреди кај децата. Повторно, американскиот ЦДЦ тврди дека повеќе деца на возраст од 1 до 4 години умираат од давење отколку од која било друга причина, а тоа често се случува во базените, но и во кадите. Факт е дека е добро и корисно да се поттикнуваат децата да научат да пливаат што е можно порано – но дури и откако децата ќе научат, родителите треба секогаш да бидат со детето додека плива подолго време.
Возење без кацига
Велосипеди, скутери, скејтборди, ховерборди… детето треба да има кацига за се. Кога се вози на какви било тркала, мора да има кацига. И тука нема дискусија. Децата, всушност, имаат несразмерно голема глава во споредба со нивното тело, па веројатноста да паднат и да ја удрат главата е поголема од онаа на возрасните. Последичните повреди се движат од удари и расеченици до потрес на мозокот и тешки мозочни крварења кои предизвикуваат трајно оштетување.
Галење непознати животни
Многу посети во итната помош може да се спречат ако децата се научат како да се однесуваат соодветно со животните, особено со оние што не ги познаваат. Важно е да ги научите дека доколку видат животно со кое сакаат да комуницираат на кој било начин, тоа мора да се направи на безбеден и контролиран начин, односно пред се да разговараат со сопственикот на животното.
