Многу родители знаат дека постојаните главоболки и покалената телесна температура се најчестите симптоми на стрептококното воспаление, кое често се јавува кај децата. Стрептококните инфекции се предизвикани од бактерии од родот Streptococcus, од кои некои се присутни на човечката кожа и слузницата и не предизвикуваат болест, додека некои видови предизвикуваат стрептококни заразни болести кои го зафаќаат грлото, средното уво, синусите, белите дробови, кожата и поткожното ткиво, а може да влијаат и на срцевите залистоци и крвта.
Но, еден од изненадувачките симптоми на болеста кај децата, за кој многу родители не знаат, може да биде повраќање придружено со болки во грлото, тврдат лекарите. Педијатарката д-р Џен Трахтенберг објаснува дека „повраќањето е знак за стрептококно воспаление на грлото, особено кај децата“. Затоа е важно да се обрне внимание на овој, но и на другите симптоми кои укажуваат на оваа опасна инфекција.
Кои други симптоми се поврзани со стрептококна инфекција?
Симптомите на стрептококната инфекција се слични на симптомите на многу други вирусни инфекции, поради што лекарите често спроведуваат тестирања пред да препишат антибиотици. Овие инфекции се многу почести кај децата отколку кај возрасните, а педијатарот Трахтенберг истакнува дека во нејзината пракса редовно се среќава со овие симптоми кај пациенти кои се разболеле:
- Покачена телесна температура.
- Болки во грлото, кои покрај болката може да вклучуваат црвени точки на задниот дел од грлото, отечени крајници или бели наслаги во устата.
- Отечени лимфни јазли (жлезди на вратот).
- Болка во стомакот и повраќање.
Лекарите наведуваат дека болките во грлото предизвикани од стрептококна инфекција обично се појавуваат ненадејно, а децата често се жалат на отежнато голтање.
За да утврдат за што станува збор, лекарите ќе направат тест за стрептокок, но често не за деца под три години, открива педијатарката. Таа додава дека стрептококната инфекција е ретка кај деца под три години, а на таа возраст овие симптоми се почесто резултат на вирусни инфекции.
Кога е потребно да се побара лекарска помош?
„Повеќето болки во грлото не се стрептококни, а повеќето повраќања не се поврзани со стрептокока, но комбинацијата на овие два симптоми може да биде предупредувачки знак“, смета педијатарката. Таа ги издвојува и знаците на стрептококна инфекција за кои е потребна посета на педијатар, во случај родителите да не се сигурни на што да внимаваат. Еве што наведува таа:
- Болки во грлото и отечени лимфни јазли.
- Болки во грлото и покачена температура.
- Болки во грлото и осип.
- Болка во грлото која трае подолго од 48 часа.
- Било која комбинација од горенаведените симптоми.
