Да се биде родител е една од најтешките работи со кои можеме да се сретнеме, особено во првите неколку месеци кога во семејството ќе пристигне малото бебе. Како што објаснува педијатарот д-р Нилеш Рао, родителството е процес на учење во кое повремено правиме грешки и ги надминуваме пречките. Но, избегнувањето на некои вообичаени грешки може да го направи целиот процес на приспособување на новите родители полесен и помалку стресен.
Кревање паника за се и сешто
Најчеста грешка што ја прави секој нов родител е кревање паника за се. Како што објаснува педијатарот, родителите првите неколку години од родителството ги минуваат грижејќи се за многу работи. Бебешката исхрана, спиење, плачење… Ги загрижува апсолутно се.
„Значи, ако сте еден од оние родители кои паничат, престанете да се грижите за се и сешто. Грижата за несакани работи нема да ви донесе ништо добро, а нема да му донесе ниту на вашето бебе. Наместо тоа, бидете смирени и редовно носете го вашето бебе на лекар, оставете ги експертите да ви ја објаснат вашата загриженост“, објаснува д-р Рао.
Занемарување на оралната нега
Новопечените родители често ја занемаруваат оралната нега на децата додека не е предоцна, предупредува педијатарот. Имено, оралната хигиена е исто толку важна за доенчињата како и за возрасните. „Следниот пат секако не заборавајте да ги избришете непцата на вашето бебе со влажна, мека крпа откако ќе го нахраните. На овој начин ќе спречите појава на кариес и други бактерии во устата на детето“, додава тој.
Игнорирање на вашиот партнер
Доаѓањето на нов член во семејството може да не окупира толку многу што несвесно би можеле да заборавиме на партнерот. „Важно е да му дадете предност на партнерот и да поминете квалитетно време со него. Можете да го оставите бебето кај родителите или на чување и да одите на вечера со вашиот партнер. Ова ќе ви помогне да ја одржите искрата во вашата врска или брак, а исто така ќе придонесе за подобра атмосфера во домот“, советува д-р Рао.
Расправија со партнерот пред детето
Педијатарот предупредува дека многу родители поради исцрпеност, недостаток на сон и многу обврски имаат проблеми во врската кои ги решаваат со расправија. Меѓутоа, во овој случај потребно е што повеќе да избегнувате расправии и викање пред детето. „Никогаш не правете го ова затоа што постојаното карање може да има негативен ефект врз мозокот на новороденчето. Имено, неговиот мозок е многу чувствителен, па секој вид на стрес може да го забави развојот на детето“, објаснува тој.
